भांगरभूंय | प्रतिनिधी
मुख्यमंत्री डॉ. प्रमोद सावंतः सरकाराच्यो 121 येवजण्यो, तांचो लाव लोकांक मेळप गरजेचें
भांगरभूंय । प्रतिनिधी
केपें: हें सरकार लोकांचें. लोकांचे प्रस्न सोडोवपाचे सरकार सदांच यत्न करता, अशें मुख्यमंत्री डॉ. प्रमोद सावंत हांणी सांगलें.
केप्यां प्रशासन तुमच्या दारांत कार्यावळींत मुख्यमंत्री डॉ. सावंत उलयताले. ह्या वेळार आमदार एल्टन डिकॉस्टा, आदले आमदार चंद्रकांत कवळेंकार, केपेंची नगराध्यक्ष सुचिता शिरवयकार, कुडचडेंची नगराध्यक्ष डॉ. जेस्मीन ब्रागांझा, जिल्हो पंचायत वांगडी खुशाली जो. वेळीप, सिद्धार्थ गांवस देसाय, शाणू वेळीप, संजना वेळीप, डॉ. वि. चदावेलू, आश्वीन चंद्रू, उपजिल्होधिकारी शर्मिला गांवकार आनी हेर मानेस्त हाजीर आशिल्ले.
आवय बापूय नाशिल्ल्या भुरग्यांक 3 हजार रुपयांची बचपन येवजण दितात. रस्त्याचेर अपघातांत मरण आयिल्ल्यांच्या घरच्यान 2 लाख रुपया दितात. अशे तरेच्यो सरकाराच्यो 121 येवजण्यो आसात. ताचो लाव लोकांक मेळप गरजेचें आसा. सरकारान कोरोना म्हामारी काळांत 80 कोटी लोकांक फुकट रेशन दिवपाचें काम मोदी सरकारान केलां. वीज, उदक आनी रस्ते ह्यो मुळाव्यो गजाली लोकांक मेळप गरजेच्यो आसात. ते दिवपाचो यत्न सरकार करता, अशी म्हायती मुख्यमंत्री डॉ. सावंत हांणी दिली.
फुडारांत सगळ्या शाळांचें नुतनीकरण करतले. सरकारी कार्यालयां, पंचायती, शाळे खातीर सरकारी जमीन दिवपाक कसलीच हरकत ना. कारण ती कोणाक वैयक्तीक न्हय जाल्यार लोकां खातीर आसा. गोंयच्या इतिहासांत पयलेच खेपे बाराय म्हालांनी बाराय मंत्री हाजीर रावून लोकांच्यो समस्या आयकून त्यो सोडोवपाचो यत्न करतले. लोकांनी तांचे मुखार आपल्यो समस्या मांडच्यो. लोकांनीय मुखार सरून सरकाराच्यो येवजण्यो समजून घेवन ताचो लाव घेवचो, अशें मुख्यमंत्री डॉ. प्रमोद सावंत हांणी सांगलें.
अंत्योदय तत्वाचेर चलपी आमचें सरकार. प्रधानमंत्री नरेंद्र मोदी हांच्या फुडारपणा खाला आत्मनिर्भर भारत करतना स्वयंपूर्ण गोंया खातीर स्वयंपूर्ण मित्र आनी नोडल ऑफिसर काम करतात. फाटलीं तीन वर्सां हें काम नेमान चल्लां. निमाण्या घटका मेरेनचो विचार सरकार करता. दरेके व्यक्तीन स्वताच्या पांयार उबे रावून स्वंयपूर्ण जावप आनी स्वयंपूर्ण गोंय करपाचें ध्येय आसा, अशें मुख्यमंत्री डॉ. सावंत हांणी सांगलें.
मुख्यमंत्री डॉ. सावंत हांणी केप्यां येवन लोकांच्यो समस्या समजून घेतिल्ले खातीर उपकारी. केप्यां साबार प्रस्न आसात. केपें पालिकेचे नवे इमारतीचें उक्तावण केलां मात ती अजून सगळ्यां खातीर उक्ती करूंक ना. ती ताकतिकेन लोकां खातीर उक्ती करची. दियाँव केप्यां उबारतात त्या खेळां मैदानाक सात वर्सां जाली, तरीय तें अजून पुराय जावंक ना. तें ताकतिकेन पुराय करचें, कारण स्पोर्टस् कॉम्प्लेक्स सोडलें जाल्यार खेळगड्यां खातीर दुसरें खंयचेंच मैदान ना, अशें आमदार डिकॉस्टा हांणी सांगलें. लोकांच्यो समस्या समजून घेवन त्यो सुटाव्यो करचे खातीर स्वयंपूर्ण गोंय करपाचें ध्येय मुख्यमंत्री डॉ. सावंत हांणी बाळगिलां. स्वयंपूर्ण मित्र ही बरी येवजण मुख्यमंत्र्यान चालीक लायल्या, अशें चंद्रकांत कवळेंकार हांणी सांगलें.
राजकारण न्हय, विकास हेंच ध्येयः एल्टन
बेतूल वाठारांत फुड पार्का खातीर सरकारान 8 लाख चौखण मिटर जमीन घेतल्या. ते जमनींतली 25 हजार चौखण मिटर जमीन थळावें पंचायत घर, मैदान, वाचपघर बांदपा खातीर दिवची. पाडी, मोरपिर्ला वाठारांतली शाळा इमारत बरे स्थितींत ना. तिचें नुतनीकरण करचें. तशेंच आदले मुख्यमंत्री मनोहर पर्रीकार हांणी डिफेन्स एक्स्पो वेळाप फातर्प्यां नवें पंचायत घर बांदपाचें आस्वासन दिल्लें, ताचोय अजून मेरेन विचार जावंक ना. वावुला ह्या ग्रामीण गांवांत अजून मेरेन रस्तो जायना. गिमाच्या दिसांनी पाडी, मोरपिर्ला वाठारांत उदकाची समस्या सतायता ती अजून मेरेन सुटावी जावंक ना. केप्यां कसलीय कार्यावळ करतले जाल्यार सभाघर ना. केपें खातीर रवींद्र भवन बांदचें. आमकां राजकारण करपाचें ना, केपेंचो विकास हेंच ध्येय आसा, अशें आमदार एल्टन डिकॉस्टा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
