भांगरभूंय | प्रतिनिधी
मडगांव, प्रतिनिधी: १९२५ त जल्मल्ले व्यक्तीचो २०२४ त १०० वो वाडदीस आसता. भाजपा सरकार १८ जानेवारी २०२४ दिसा कवी मनोहरराय सरदेसाय हांचो १०० वो वाडदीस विसरलें. ज्ञानपीठ जैतिवंत रवींद्रबाब केळेकार हांचो शंबरावो जल्मदीस ७ मार्चाक आनी त्याच दिसा तांच्या जल्मशताब्दी वर्साक सुरवात जाता. मुख्यमंत्री डॉ. प्रमोद सावंत हांणी हो दीस सरकारी कार्यावळीन मनोवचो, अशी मागणी विरोधी पक्ष फुडारी युरी आलेमाव हांणी केल्या.
भाजप सरकार मनोहरराय सरदेसाय, रवींद्रबाब केळेकार आनी हेर म्हान गोंयकारांक म्हत्व दिना. सरदेसाय आनी केळेकार हांची शताब्दी २०२५ त सुरू जाता असो दावो विधानसभेंत करपी मुख्यमंत्री डॉ. सावंत हांचो एक व्हिडिओ जारी करून युरी आलेमाव हांणी मुख्यमंत्र्यांनी गणिताचे धडे घेवप गरजेचें अशें म्हणलें.
गोंयां खातीर योगदान दिल्ल्या गोंयकारांची म्हायती राखून दवरपाक सरकारा कडेन कसलींच यंत्रणां ना, अशें आलेमाव हांणी नमूद केलें.
सरकारान राष्ट्रीय वीरांच्या नांवान उत्सव मनयले. मात, म्हान गोंयकारांचो उगडास करतना सरकारा मदीं तीं उमेद पळोवपाक मेळना अशेंय तांणी फुडें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
