भांगरभूंय | प्रतिनिधी
डॉ. रघुनंदनः बंदी आसुनूय रस्ते खणपाचेर हरकत
भांगरभूंय । प्रतिनिधी
फोंडें: सरकारान दिल्ले आदेशूच सरकार फोंडें वाठारांत पाळिना. 15 मे उपरांत रस्ते खणपाक बंदी आसतना फोंडें शारांत मात बिनधास्न रस्ते खणून भुंयगत वीज केबल घालपाचें काम चालू आसा. लोकांच्या आनी वाहनचालकांच्या हिता खातीर रस्ते खणपाचें काम पावसाळ्या उपरांत करचें, अशी मागणी फोंडेंच्या पीपल ऑफ फोंडें संस्थे वतीन केल्या.
पीपल ऑफ फोंडाचे सचीव डॉ. रघुनंदन हांणी अदीक म्हायती दितना सांगलें, गॅस पायपलायन तशेंच घाणयाऱ्या उदकाचेर प्रक्रिया करपी प्रकल्पाचें काम चालू आसतना लोकांक त्रास सोंसचो पडिल्लो. ते उपरांत भुंयगत वीज केबल घालपाच्या कामाक सुरवात जाल्या. जिल्होधिकाऱ्यांचो आदेश आसून लेगीत रस्ते खणपाचें काम सगलेच कडेन चालू आसा. ताचो परिणाम सर्वसामान्य लोकांचेर जाता. लोकांचे सुरक्षे खातीर तें काम पावसाळ्या उपरांत करपाची गरज आसा. बांदकाम खात्यान भुंयगत वीज केबल घालपाच्या कामाक दिल्ली परवानगेची मुजत 30 एप्रीलाक सोंपल्या. पूण सध्या भुंयगत वीज केबल घालपाचें काम चालू आशिल्ल्यान ताचो परिणाम येरादारीचेर जाता, अशें डॉ. रघुनंदन हांणी सांगलें.
ह्या वेळार गोंय रस्तो सुरक्षा फोरमाचे दिलीप नायक हांणी सांगलें, लोकां कडल्यान नेमांची अपेक्षा बाळगुपी सरकार बिनधास्त नेम मोडटा, हे स्पश्ट दिसा. भुंयगत वीज केबल घालपाच्या कामाक कोणाचोच विरोध ना. पूण कायद्याचे फास्केंत रावून सरकारान उदरगत कामां करपाची गरज आसा. ह्या प्रमोद सावंत, बिपीन वेरेंकार, डॉ. राजेंद्र देव, सुदेश नार्वेकार आनी हेर पदाधिकारी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
