सरकारी नोकर…

भांगरभूंय | प्रतिनिधी

जी सकाळ कोंब्यान साद घालचे पयलींच जाता. स वरांचेर उठून दनपारच्या जेवणाची तयारी करपांत गुल्ल जावपी हांव आयचे घडयेक एकलेंच आसपा ना. सकाळ फुडें दोळे उगडी नासताना खाटीर न्हिदिल्ले कडल्यान
साद घालून च्याव तयार करपाची ऑर्द दिवपी हांव आयज घरचीं उठचे
पयलींच चुलीर च्याव दवरतां. कितल्याश्याच खेपे तर कामार वचपाचे गडबडीन स्वताची च्याव उदका वरी पियेवन धांवतां.
हरशीं आमी दोगांय कामाक वयतात. हांव टिचर आनी हे वीज खात्यांत आसता. दोगांय सरकारी. मात म्हजे भाशेन हांचे कांयच ना. तांचें काम साप्प म्हज्या कामाच्या उरफाटें. वेळाचें तांकां कसलेंच बंदन ना, आसलेंय तरी तांकां कांयच फरक पडना. कामाचेंय तांकां कसलेंच टॅन्शन ना.
देखून सद्या आमचें हे सुशेगाद प्राणी जाल्यात. मुळांत कितें? सरकारी नोकराक ना कोणाचो भंय, ना जिबेक वंय. दुसऱ्यांक गिन्याना दिवपाक मात हांची जीब बरीच फिशाल.
सकाळीं 9 वरांचेर भायर सरतात आनी सांजे 6 वरांचेर घरा पावतात. हांच्या कामार कोण कितल्यांक पावता तें पळोवपाक शिपाय नासता. आनी एकाद्रे पार्टेक गेल्यार घरा पावपाक हांका शुद्ध नासता. एक मात शुद्ध नासताना
लेगीत गजाली कश्यो गोड-गोड सांगप. कोणाकूय फुसलावन बोल्सांत घालपा इतलें म्होंवाळ उलोवपाक तांकां बेस बरें जमता.
तरीय तातूंत थोडे आमच्या भावोजी सारकें आसतात. जे प्रामाणीकपणान सकाळ सावन सांज मेरेन आपलें काम तर करतात आनी दुसऱ्यांचेय वजें आपल्या माथ्यार घेतात. तांच्यानीच हांका कामाक लायल्लें खंय. आनी हेंय बीं मोट्या झेतान म्हाका म्हणटात कशें, “फावोरा शिवाय कोणाकूच सरकारी नोकरी मेळप म्हळ्यार next to possible…”
Impossible my foot, हांव फाटलीं 4 वर्सां शिक्षिका म्हूण काम करता तें हांकां दिसना कांय? बापायन शिकोवपाक भरभरून पयशे मोडले. दुसऱ्यांच्या म्हऱ्यांत मान वयर उलोवपा इतलें बळगें दिलें मात केन्नाच कोणा मुखार हात पसरोवंक शिकयलें ना. म्हज्या नशिबान मात हात पसरावपीच मणी दिलो हेंच दुखणें.
देव जाणां खंयचे घडयेक देवा लागीं सरकारी नोकर मागिल्लो… स्वता खातीर तरी नोकर मागपाचें. आयज मातसो जिवाक सुशेग मेळपाचो.
घोवाल्यो कागाळी सांगता म्हूण तुमीय तांकां शिणशात आतां… तशें खूब बरे ते… म्हाकाय खूब बरें करता हां… कोण म्हणटा? आमचे हे…