भांगरभूंय | प्रतिनिधी
पणजीः गोंयचे शेतकार शेती वेवसाया वटेन वळून आयज लाखांनी रुपयां जोडटात. फाटल्या पांच म्हयन्यांत गोंयांतल्या मुखेल 10 शेतकारांनी 171.6 टन भाजी फलोत्पादन म्हामंडळाक दिल्या. तातूंत तांणी 71.37 लाख रुपया जोडल्यात. हे सगळे शेतकार गांवगिऱ्या वाठारांतले आसात. अत्याधुनीक तंत्रज्ञाना वरवी शेती करून तांणी पांच म्हयन्यांत लाखांनी रुपयांची उलाढाल केल्या.
सामान्य मनीस वर्सभर सरकारी नोकरी करून जितलें जोडपाक शकना ताचे परस कितलेशेच पटीन अदीक पयशे शेती वेवसाय करून कांय शेतकार जोडटात. नागेश विष्णू सामंत ह्या धारबांदोडेंच्या शेतकारान फक्त 5 म्हयन्यांत 54.05 टन भाजी फलोत्पादन म्हामंडळाक दिल्या. तातूंत तांणी 23.29 लाख रुपया जोडले. अशे तरेन हेर विवीध शेतकार लाखांनी रुपया जोडटात.
शेतकारांक कृशी खात्या कडल्यान मेळिल्ली उर्बा तशेंच वेळार मेळपी अनुदानाक लागून आतां खूबशे लोक शेती वटेन वळटात. गावठी भाजयेक व्हड मागणी आशिल्ल्यान खंयच्याच शेतकाराचो म्हाल कुसना. ताका लागून कोरोना म्हामारी उपरांत खूबशे लोक शेती वेवसायांत देंवल्यात आनी ताका लागून शेतीचें उत्पन्न वाडलां.
शेती खातीर जिद्द गरजेचीः चंद्रहास देसाय
शेती करचे खातीर आपल्याक जिद्द जाय. फलोत्पादन म्हामंडळ ह्या शेतकारांनी पिकयिल्ली सगळी भाजी खरेदी करता. ह्या शेतकारांक बरो दर दितात. शेती वेवसायांतल्यान खूबशे शेतकार वर्साक लाखांनी जोडटात, अशें फलोत्पादन म्हामंडळाचे वेवस्थापकी संचालक चंद्रहास देसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
