सरकारी नोंदणे बगर घरांत गांवठी सुणे पोसप्यांचेर जातली कारवाय

भांगरभूंय | प्रतिनिधी

पशु संवर्धन मंत्री निळकंठ हळर्णकार हांची शिटकावणी

पणजीः घरांत गांवठी सुणी पोसप्यांचेर सरकारान खर निर्बंध घालपाचो निर्णय घेतला. जे लोक पोशिल्ल्या गांवठी सुण्यांची पशु संवर्धन खात्या कडेन नोंद करिनात आनी सुण्यांचे पेटे रस्त्यार सोडटात, तांकां दंड दिवपाचो निर्णय सरकारान घेतला. रस्त्याद सुण्यांचो सर्व्हे करून तांचे संख्येचेर नियंत्रण दवरपा विशींचो आराखडो तयार करतले अशें पशु संवर्धन मंत्री निळकंठ हळर्णकार हांणी सांगलें.
मंत्रालयांत शुक्रारा मंत्री हळर्णकार हांचे फुडारपणा खाला रस्ताद सुण्यांच्या निर्बिजीकरणा विशीं बसका जाली. ह्या वेळार विरोधी पक्ष फुडारी युरी आलेमांव, विरोधी तशेंच सत्ताधारी आमदार आनी एनजीओ हाजीर आशिल्ले.
बसके उपरांत म्हायती दितना मंत्री हळर्णकार हांणी सांगलें, फाटल्या विधानसभा अधिवेशनात रस्त्याद सुण्यां विशीं धोरण हाडपाचें आश्वासन दिल्ले. हो गंभीर विशय आशिल्ल्यान आमी विरोधी तशेंच सत्ताधारी आमदार आनी एनजीओ हांकां सुचोवण्यो दिवपा खातीर आपयिल्ले. रस्ताद सुण्यांचे निर्बिजीकरण करून तांची संख्या वाडची न्हय हो महत्वाचो मुद्दो आशिल्लो. निर्बिजीकरणा खातीर खाते पंचायतीक निधी दिता, पूण तो ह्या कामा खातीर पावना अशी कागाळ एनजीओंनी केल्ली. देखून चडांत चड निर्बिजीकरण करपा खातीर दुसरो पर्याय कितें आसपाक शकता हे विशीं एनजीओंनी आपल्यो सुचोवण्यो दिल्यात, अशी म्हायती हळर्णकार हांणी दिली.
ह्या सप्तका भितर तांणी दिल्ल्या सुचोवण्यांची चाचपणी करतले. ताचे वांगडा सुणें धरपी आनी हेर वावुरप्यांक बरोबर घेवन रस्त्याद सुण्यांचो सर्व्हे करतले. हे विशींचो आराखडो तयार करून फुडली प्रक्रिया आमी चालीक लायतले. रस्ताद सुण्यांचे निर्बिजीकरण करून सुण्यांच्या जल्माचेर कशें नियंत्रण येतले हाचेर उपाय येवजण चालीक लावपाचे आमी थारयलां. खाते, एनजीओ, पंचायत आनी पालिका एकठांय आयल्यारुच हो प्रश्न सुटावो जातलो, अशें हळर्णकार हांणी सांगलें.
जे घरांत सुणी पोसतात ते लोक पाच-स सुणी जल्माक आयली कांय बरीशीं एक- दोन दवरून उरिल्ली रस्त्यार सोडटात. घरांतलो गांवठी सुणो जर आमचे कडेन नोंद ना आनी तांणे घरांत पोरां काडल्यांत जाल्यार घरधनयाक दंड दितले. रस्ताद सुण्यांच्या निर्बिजीकरणा खातीर बजेट तरतुद वाडोवपाची गरज ना. हे खातीर निधी आसा पूण दोन वर्सा जाली हाचो वापर जायना. हे विशीं आमी एनजीओ कडल्यान सुचोवण्यो घेतल्यात, अशें हळर्णकार हांणी सांगले.
मजगतीं, बसकेक हजर आशिल्ले विरोधी पक्ष फुडारी युरी आलेमाव हांणी बसके उपरांत सांगलें की रस्ताद सुणांच्या विशयांचेर सरकार गंभीर ना. रस्त्याद सुण्यांच्या निर्बिजीकरणा खातीर तीन कोटींची बजेट तरदूत केल्ली, पूण तांतूतले 58 लाखूच मोडल्यात. ते भायर थळाव्यो पंचायती ह्या कामांत मात पसून सहकार्य करीनात अशी कागाळ एनजीओंनी केल्या. निर्बिजीकरणाचो खर्च कोटी रुपया परस चड जाता देखून हे गजालींक अर्थीक तरतुद गरजेंची. तशेंच हे खातीर उत्तर आनी दक्षीण गोंयात दोन केंद्रां करचे परस दरेका मतदारसंघात हीं केंद्रां उबारचीं, अशी सुचोवणी आलेमांव हांणी केल्या.
जे लोक गावठी सुणीं पोसतात आनी तांचें निर्बिजीकरण (कापाव) करिनात. उपरांत पेटे जातकच ते रस्त्यार व्हरून सोडटात, तांचेर सरकारान कडक कारवाय करपाक जाय. जे बऱ्या जातीचे सुणे पोसतात तांकां प्रतिज्ञापत्र सादर करप सक्तीचें केलां. पुण धनयांक ह्या अटीं बाबतींत काय स्पश्टताय ना, देखून सरकार आनी धनी हांचे मदीं समन्वय आसप गरजेचो, अशे फांतोड्डेचे आमदार विजय सरदेसाय हांणी बसके उपरांत सांगलें.