भांगरभूंय | प्रतिनिधी
राज्यांतल्यो खाजगी नोकर्यो गोंयकारांक राखून दवरच्यो
मडगांव, प्रतिनिधी : गोंयच्यो नोकर्यो गोंयकारां खातीर राखून दवरपाक धोरण जाय. सरकारान राज्यांतल्या नोकर्यां संबंदी श्वेतपत्रिका काडची. तशेंच गोंयांत स्वतंत्र पोस्ट सर्कल जाय आनी बँकेंतल्या नोकर्या विंशीं आवाज करतलों, अशें गोवा फॉरवर्ड अध्यक्ष विजय सरदेसाय हांणी सांगलें.
पत्रकार परिशद घेवन आमदार विजय सरदेसाय हांणी राज्यांतल्यो नोकर्यो युवकांक मेळना आनी हे खातीर सरकारान यत्न करचे अशी मागणी केली. इंडोको फार्मा कंपनी कडल्यान बोईसरच्यो मुलाखती आमी आवाज करिना फुडें रद्द केल्यो. आता मडकयची आनीक एक कंपनी इनक्युब इथिकल्सान पुण्यां मुलाखती खातीर जायरात दिल्या. राज्यांतल्या कंपन्यांक सरकार इन्सेंटिव्ह दिता. राज्यांतल्या तरणाट्यांक नोकर्यो मेळचे खातीर हें करतना भायल्या लोकांक नोकरी दिवप चुकीचें. ताका लागून राज्यांतल्यो खाजगी नोकर्यो गोंयकारांक मेळचे खातीर राखून दवरच्यो आनी ताचे खातीर योग्य धोरण अंमलात हाडपाची गरज आसा.
राज्य सरकारान कितल्यो कंपनीं आसात आनी तातूंत कितल्यो नोकर्यो आसात हाचो डेटा आसपाची गरज आसा. लोकांनी कंपनी वेवस्थापना आड भुमिका घेतल्यार ताका सरकार जापसालदार आसतलें. सरकारान राज्यांतल्या नोकर्यांच्या स्थिती विशींची श्वेतपत्रिका येवपी विधानसभा अधिवेशनांत सादर करची. तशेंच बँकांनी आनी पोस्ट ऑफिसांतूय गोंयकारांक जागे मेळपाची गरज आसा. गोंय एक स्वतंत्र राज्य आशिल्ल्यान स्वतंत्र पोस्ट सर्कल आसचें. तशेंच कोकण रेल्वेय रेंट अ बायक, पॉड हॉटेल काडून गोंयकारांच्या वेवसायाचेर घालो घालता. होय एक गोंयकारां कडल्यान रोजगार काडून घेवपाचो एक प्रकार. हाचेर बेगीन उपाय काडचे आनी जर समस्या सोडयना जाल्यार कामगार आयुक्तांक घेराव घालचो पडटलो, अशें सरदेसाय हांणी सांगलें.
ओसीआय विशीं सरकाराचें आस्वासन फाटींग
राज्य सरकारान ओसीआयविशीं जनतेक दिल्लें आस्वासन फटींग थारलां. केंद्रीय गृहमंत्रालय हे विशीं निर्णय घेतलें. राज्य सरकार लोकांच्यो जमनी, इन्सेंटिव्ह दिवन कंपन्यांक उर्बा दिता आनी तांतल्यो नोकर्यो राज्या भायल्या लोकांक मेळटात. जे गोंयकार नोकर्यां खातीर देशा भायर वतात तांचे पासपोर्ट रद्द करतात. हो अन्याय जावन आसा. सरकारान ओसीआयचोय विशूय मुखार व्हरपाची गरज आसा, अशें तांणी फुडें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.