सरकारान बेगोबेग क्लब येवजण हाडपाची आमदार डिलायला लोबो हांची मागणी

भांगरभूंय | प्रतिनिधी

हणजूण-वागातोर जावपी आवाजाच्या प्रदुशणावेल्यान दिली पुलीस निरीक्षकांक भेट

म्हापशें, प्रतिनिधीः दर्यादेग वाठारांत बार अॅण्ड रेस्टॉरन्टाच्या नांवान क्लब सुरू आसात. तांचे वरवीं व्हडा प्रमाणांत आवाजाचें प्रदुशण जाता. ताका लागून सरकारान बेगोबेग क्लब येवजण हाडपाची मागणी आमदार डिलायला लोबो हांणी केली. आवाज प्रदूशणाचेर तोडगो येवंक ना जाल्यार उच्च न्यायालयाच्या दाराचेर धरणें धरतले, अशे तांणी सांगलें.
आवाजाच्या प्रदुशणा विशीं वागातोर आनी हणजूणच्या थळाव्यां सयत पुलीस निरीक्षक परेश नायक हांची आमदार लोबो हांणी भेट घेतली. ह्या वेळार सरपंच लक्ष्मीदास चिमुलकार आनी पंच वांगडी दिनेश पाटील, येरादारी पुलीस निरीक्षक सीताकांत नायक हजर आशिल्ले.
फाटल्या कांय दिसां सावन वागातोर आनी हणजूण दर्यादेग वाठारांत नेटान वाजपी संगीताक लागून हांगचे नागरीक उबगल्यात. हांगच्या नागरिकांनी स्वातंत्र्य दिसा १५ ऑगस्टाक गांवांत आवाजाच्या प्रदुशणाचेर आनी हे समस्येचेर सरकाराचें लक्ष्य ओडून घेवपाक मेणवातींची फेरी काडपाचो निर्णय घेतिल्लो.
हेच फाटभूंयेर बुधवारा सकाळीं आमदार डिलायला लोबो हांणी पंचायत मंडळ आनी आवाजाच्या प्रदुशणाक लागून उबगल्ल्या नागरिकां सयत सकाळीं पुलीस स्टेशनांत निरीक्षक नायक हांची भेट घेतली. तांकां रातचें उसरां मेरेन चलपी आवाजाच्या प्रदुशणा विशीं जाप विचारली. रातचें १० उपरांत संगीत वाजोवपाक दिवचें न्हय अशी मागणी तांणी केली तेन्ना ह्यान फुडें रातीं १० वरां उपरांत खंयच्याच आस्थापनांत संगीत वाजोवपाक दिवचे ना, अशें आस्वासन पुलीस निरीक्षक नायक हांणी दिलें.
हो आवाजाच्या प्रदुशणाचो विशय थळाव्या लोकांचे भलायके कडेन संबंदीत आसा. ताका लागून आमी पुलीस निरीक्षकांची भेट घेतल्या. तशेंच जिल्लोधिकारी, उपजिल्लोधिकारी, पुलीस अधीक्षक आनी उपअधीक्षक हांकां निवेदन सादर करतले.
आमदार डिलायला लोबो हांणी सांगलें, पर्यटन हो सध्या आमचे येणावळीचो कणो. आमकां पर्यटक आयिल्ले जाय. मात रातभर व्हड आवाजांत संगीताच्या तालार मस्ती करप्यांचो त्रास थळाव्यांक जावपाक जायना. होच संदेश दिवपाक आजय आमी पुलीस निरीक्षकांची भेट घेतली, जाका लागून आमच्या लोकांचेर रस्त्यार देंवून आंदोलन करपाची वेळ प्रशासनान हाडची न्हय.