भांगरभूंय | प्रतिनिधी
विजय सरदेसायः थळाव्या फुडाऱ्यांनी बायपासाचो प्रस्न हुमकळत दवरला
भांगरभूंय । प्रतिनिधी
फोंडें: भोमा गांवांतल्या लोकांच्या बायपास रस्त्याचेर उपाय काडचे खातीर केंद्रीय मंत्री नितीन गडकरी हांचे कडेन आपणे चर्चा केल्ली. त्या वेळार केंद्रीय मंत्र्यान भोमाच्या लोकांचे मागणेची दखल घेवन उपाय काडपाचें आस्वासन दिल्लें, पूण थळाव्या राजकी फुडाऱ्यांनी केंद्रीय मंत्र्याची दिशाभूल करून भोमांतल्या लोकांचो प्रस्न हुमकळत दवरला. भोमाच्या लोकांक गोंय सरकारान गृहीत धरल्यात. येता ते लोकसभा वेंचणुकेंत सरकाराच्या आत्मविस्वासाक तडो दिवचो, असो उलो गोवा फॉरवर्डाचे आमदार विजय सरदेसाय हांणी मारलो.
भोमा गांवांत आयतारा दनपारां आयोजीत केल्ले कोनसो बसकेंत आमदार सरदेसाय उलयताले. त्या वेळार इंडिया आघाडीचे काँग्रेस उमेदवार अॅड. रमाकांत खलप, आमदार कार्लोस फेरेरा, राजन घाटे, अॅड. सुरेल तिळवे, रामकृष्ण जल्मी, दुर्गादास कामत आनी हेर मानेस्त हाजीर आशिल्ले.
भाजप सरकारांत देवा कडेन उलोवपी आमदार आसात. ताका लागून तांचो आत्मविस्वास वाडला. भोमांतल्या लोकांक फटोवन कांय राजकी फुडाऱ्यांक लाव दिवपाचो यत्न सरकार करता. ताका लागून लोकसभा वेंचणुकेंत थळाव्या लोकांनी भाजपा उमेदवाराक ताची सुवात दाखोवन दिवपाची गरज आसा, अशें सरदेसाय हांणी सांगलें.
उमेदवार अॅड. रमाकांत खलप हांणी सांगलें, श्रीपाद नायक हांणी 25 वर्सां खासदार म्हूण काम पळयलें. पूण लोकांचे प्रस्न सोडोवपाचो केन्नाच यत्न करूंक ना. ताका लागून श्रीपाद नायक हांकां सुसेग दिवचे खातीर काँग्रेसीक मतदान करपाची गरज आसा. वेंचून आयले उपरांत सगळ्यांत पयलीं भोमांतल्या लोकांचो प्रस्न लोकसभेंत मांडटलों, अशें अॅड. खलप हांणी सांगलें. ह्या वेळार आमदार कार्लोस फेरेरा, राजन घाटे, अॅड. सुरेल तिळवे आनी रामकृष्ण जल्मी हांणी आपले विचार मांडले आनी अॅड. रमाकांत खलप हांकां जैतिवंत करपाचो उलो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
