समाजीक बदला खातीर रमजान

भांगरभूंय | प्रतिनिधी

उपास करतना, लोक खावप, पिवप आनी नकारात्मक वागणुकेंत वांटो घेवपा पसून पयस रावतात, हें सगळें ईश्वराच्या  उपस्थिती विशीं चड जागृताय निर्माण करता. रमजाना निमतान विशेश लेख.

उपासाचो म्हयनो म्हूण नामना मेळिल्लो रमजान कुराणाच्या माध्यमांतल्यान आमच्या निर्मात्यान आमकां दिल्ल्या मार्गदर्शना खातीर ताचें उपकार मानपाचो एक प्रसंग म्हूण काम करता. सर्वशक्तिमानान आमकां जिविताचें इनाम सोंपयलां. तातूंत हवा, उदक, गुरुत्वाकर्शण, सूर्य, चंद्र आनी हेर जायत्यो गरजेच्यो गजाली आसात. हें बारीकसाणेन तयार केल्लें विश्व जापसालदारकेची गरज अधोरेखित करता. आमचें जिवीत आनी आशिर्वाद फकत मनरिजवणे न्हय तर हांचो गंभीर उद्देश आसा. ताका लागून आमच्या निर्मात्यान आमच्या शरिरांक पोशण दिलां, तशेंच आत्म्याच्या शुद्धीकरणा खातीर  मार्गदर्शनाच्या रुपान पैगंबर आणि ग्रंथ धाडल्यात. पुर्विल्ल्या काळा सावन नोहा, इब्राहीम, मोझेस, जेजू  इत्यादी दूतां वरवीं तशेंच तोरा, झुबूर, बायबल ह्या धर्मग्रंथांतल्यान हें मार्गदर्शन दिलां. कांय जाणांनी हे शिकवणींक निश्ठेन पाळो दिलो, जाल्यार कांय जाण सदाचरणाच्या मार्गा पसून फाटीं सरले, ताका लागून ईश्वरी  संदेश आनी आज्ञ भ्रश्ट जाल्यो. 

अल्लान/ ईश्वरान निमाणो पैगंबर मुहंमद हाका निमाणो प्रकटीकरण, कुराण दिवन धाडलो. हो अभ्रश्ट आनी सुरक्षीत धर्मग्रंथ सुदारीत आवृत्ती म्हूण काम करता. तातूंत आदल्या धर्मग्रंथांक सुसंगत अशी शिकवण आसा. योग्य आनी अयोग्य हांचे मदलो निकश, अस्तित्वा खातीर सर्वसमावेशक मार्गदर्शक, जिणेचो हेतू स्पश्ट करप आनी अंधश्रद्धे पसून मुक्त जावन आमच्या प्रभूची तर्कशुध्द समज निर्माण करपाचें काम करता.

आमच्या निर्मात्याक कितें प्रसन्न, अप्रसन्न करता तें कुराणांत सांगलां. मनीसपणान पाळपाची ईश्वरी आचारसंहिता सादर केल्या. ती निवाड्याच्या दिसा परलोकांत आमचें यश वा अपेस थारायता. जातूंत सार्वकालिक जिवीत आसता. अशे तरेन कुराण ईश्वरी बुद्धीचो दिवो म्हूण उबें आसा, आमकां अध्यात्मीक परिपूर्णताय आनी शाश्वत मोक्ष मेळोवपा खातीर तें मार्गदर्शन करता.

निमाणो करार, कुराण, रमजानांत ताचे अवतरण  सुरू जालें आनी 23 वर्सांच्या काळांत ल्हव ल्हव श्लोक अवतरित जाले. ताच्या मुळांत इस्लामाची थापणूक विश्वाच्या खऱ्या प्रभूचेर मान्यताय आनी विस्वास, फकत ताचे कडेन उपासना समर्पीत करप आनी जिणेच्या सगळ्या आंगांचेर ताणें थारायिल्ल्या ईश्वरी आचारसंहितेक पाळो दिवप हांचेर आदारिल्ली आसा.

रमजानांत उपास करप ही स्वताक अल्लाचे आज्ञा कडेन जुळोवन घेवपाची एक मुखेल प्रथा म्हूण काम करता. ताचे शिकवणेक शिस्त, आज्ञापालन करपी, प्रशिक्षण मैदान म्हूण काम करता. उपास करून आस्तिकांक अल्लाचेर आदारून रावपाची याद करून दिता. तांकां धीर, आत्मनियंत्रण, दुसऱ्यां विशीं सहानुभूती ह्या सारक्या गुणांक मूर्त रूप दिवपाक प्रोत्साहन दिता. तो एक अध्यात्मीक प्रवास म्हूण काम करता. ईश्वरी जिणे कडेन आपलो संबंद खोल करता आनी धर्मीक जिविता कडेन वचनबद्धताय घटमूट करता. अशे तरेन रमजान कुराणाच्या उगडासाचो भोवमान करून लोकांक इस्लामाच्या तत्वांक आंतरीक करपाक आनी जगपाक परिवर्तनकारी काळ म्हूण काम करता.

उपास करतना, लोक खावप, पिवप आनी नकारात्मक वागणुकेंत वांटो घेवपा पसून पयस रावतात, हें सगळें ईश्वराच्या  उपस्थिती विशीं चड जागृताय निर्माण करता. आपल्या निर्मात्या कडेन निश्ठा दवरून आनी ताच्या आज्ञांक पाळो दिवन ते समर्पीत सेवकांची भुमिका दाखयतात. ही वृत्ती जिणेच्या दर एका आंगाक व्याप्त जावन, ईश्वराच्या मार्गदर्शनाची खोल जाणविकाय वाडयता.

ईश्वराच्या सर्वव्यापकतेची ही पावती चुकीच्या कामा आड प्रतिबंधक म्हूण काम करता, जाका लागून व्यक्तींक आत्मसंयम बाळगपाक आनी प्रलोभनांचो प्रतिकार करपाक प्रवृत्त जाता. ईश्वरी नैतीक तत्वां कडेन आडनदर केल्ल्यान जायत्यो समाजीक वायट घडणुको निर्माण जातात. इत्सा आनी कृतींचेर नियंत्रण दवरून आस्तिक समाज सुदारणेक हातभार लायतात.

एक देख म्हळ्यार, कुराणांत अल्लाह म्हणटा, ‘सैतानाची येवजण म्हळ्यार नशा आनी जुगार हाची सवय घालून तुमचे मदीं दुस्मानकाय, दुस्वास निर्माण करप आनी तुमकां अल्लाचें स्मरण, प्रार्थना करपा पसून आडावप. तेन्ना तुमी पयस रावचे नात? (5: 91)

हांगा अल्लाह नशा आनी जुगाराच्या प्रभावा आड शिटकावणी दिता. अशा दुर्गुणां पसून पयस रावन व्यक्ती आपल्या निर्मात्या कडेन आशिल्ल्या संबंदांचें पावित्र्य राखतात. समाजा भितर एकचाराची चालना दितात. अशे तरेन उपास केल्यार फकत आत्मो शुद्ध जायना जाल्यार सकारात्मक बदलाक उत्प्रेरक म्हूण काम करता, आत्मशिस्तीचें म्हत्व आनी ईश्वरी  मार्गदर्शनाक पाळो दिवपाचें काम करता.

रमजानाची दुसरी बाजू म्हळ्यार जकात दिवप वा सक्तीचें दानधर्म. हे पद्दतींत बचतींतलो 2.5% वांटो दान करप, समाजांतल्या गरीब वांगड्यांक वयर काडपाचें साधन म्हूण काम करप हांचो आस्पाव जाता. जकात फकत अर्थीक उदरगतीक चालना दिना तर भौतिकवादा आडूय झुजता, ताका लागून व्यक्तींक आपल्या खर्चाच्या संवयेचें परतून मुल्यांकन करपाक आनी निस्वार्थीपणाक प्राधान्य दिवपाक प्रवृत्त करता. इनामांची अपेक्षा करिनासतना दिवपाची मानसिकताय रुजोवन जकात उंचेल्या मानवी मुल्यांची लागवड करता, दुस्वासी प्रवृत्ती उणी करता आनी उदारतायेची संस्कृताय वाडयता.

ते भायर, रमजानांत उपास केल्ल्यान वेगवेगळ्या दुयेंसांचेर उपचार करपी शरिराचें डिटॉक्सिफिकेशन सोंपें जाता. भलायकेचेर हो भर एक बळिश्ट समाज घडोवपाक चालना दिता. ह्या प्रथांवरवीं रमजान वैयक्तीक वाडीक पोसवण दिवन सकारात्मक समाजीक बदलाक उर्बा दिता. आत्मनियंत्रण, शिस्त, मोग आनी करुणा हांकां उर्बा दिवन रमजान धर्मादाय कार्यांक उर्बा दिता. समाजा भितर हेरांच्या कल्याणा खातीर चिंतपाक चालना दिता. अशे तरेन रमजान एक परिवर्तनकारी शक्ती म्हूण काम करता, व्यक्तींक समाज आनी संवसाराचे उदरगतींत योगदान दिवपाक प्रेरणा दिता.

नजराना दरवेश

8975074456