भांगरभूंय | प्रतिनिधी
मुंबय, खबरां संस्था: मुंबय उच्च न्यायालयान लिंगीक छळ प्रकरणांत निकाल दितना म्हणलें, लोक आपल्यो समस्या घेवन तांत्रीक आनी बाबां कडेन वतात. हें आयच्या काळांतलें व्हडलें दुर्दैव. तांत्रीक उपायांच्या नांवा खाला लोकांचें शोशण करतात.
हे तांत्रीक आनी बाबा लोकांच्या दुबळेपणाचो आनी अंधश्रद्धेचो फायदो घेतात. समस्या सोडोवपाच्या नांवान ते लोकां कडल्यान पयशे घेतात, तशेंच पिडेस्ताक लिंगीक त्रासूय दितात, अशें निरीक्षण न्यायालयान नोंद केलां.
स नेण्ट्यां चलयांचेर लिंगीक अत्याचार करप्याची ख्यास्त मान्य करतना मुंबय उच्च न्यायालयान ही टिप्पणी केल्या. न्यायमूर्ती रेवती मोहिते ढेरे आनी न्यायमूर्ती मंजूशा देशपांडे हांच्या खंडपिठामुखार ह्या प्रकरणाची सुनावणी जाली.
४५ वर्सां पिरायेच्या ह्या मनशान आपूण तांत्रीक आशिल्ल्याचो दावो केला. मतीमंद चलयांचेर तो उपचाराच्या नांवान लिंगीक अत्याचार करतालो. तशेंच नेण्ट्यां चलयांच्या पालकां कडल्यान उपचार करपाच्या नांवान ताणें आतां मेरेन १ कोटी ३० लाख रुपया घेतल्यात असो आरोप आसा.
२०१० वर्सा एफआयआर दाखल
ह्या प्रकरणांत २०१० वर्सा एफआयआर दाखल जाल्ली. २०१६ वर्सा सत्र न्यायालयान ह्या तांत्रिकाक दोशी थारावन ताका जल्मभराचे बंदखणीची ख्यास्त फर्मायल्ली. सत्र न्यायालयाच्या ह्या निर्णयाक तांत्रिकान मुंबय उच्च न्यायालयांत आव्हान दिलें. उच्च न्यायालयान ताची याचिका न्हयकारली आनी ख्यास्त कायम केली.
ही अंधश्रद्धेची विचीत्र केस
उच्च न्यायालयान ह्या प्रकरणा विशीं फेब्रुवारींत निर्णय दिल्लो. न्यायालयाचो निकाल शेनवारा (२ मार्च) आयलो. न्यायालयान हातूंत म्हणलें – ही अंधश्रध्देची विचीत्र केस. ही ख्यास्त उणी करची न्हय. तांत्रिका आड खर पुरावे मेळ्ळ्यात आनी ताच्या शोशणाक बळी पडिल्ल्यांचो आंकडो चड आसा. अशे स्थितींत ताची ख्यास्तूय गुन्यांवाच्या प्रमाणांत आसूंक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
