समर्पीतपणान एकवटान काम करपाचो सोपूत घेवया

भांगरभूंय | प्रतिनिधी

राज्यपालांचो गोंयकारांक स्वातंत्र्य दिसा निमतान संदेश

राज्यपाल पी. एस. श्रीधरन पिल्लई हांणी गोंयकारांक भारताच्या स्वातंत्र्य दिसाचीं परबीं भेटयलीं.  भारतीय स्वातंत्र्याच्या 75 व्या वर्धापन दिसाच्या ह्या भव्य आनी किर्तवंत अशा उमेदीच्या प्रसंगार हांव सगल्यांक मना- काळजा सावन उर्बेभरीत परबीं आनी शुभकामना भेटयतां. सगल्यांत पयलीं आमी आमकां स्वातंत्र्य दिवपा खातीर आपले जिणेचो त्याग केल्ल्या आमच्या सगल्या म्हान स्वातंत्र्य सैनिकांचो उगडास करूया. आयज आमी ह्या पराक्रमी आत्म्यांक नमन करूया. तशेंच समाजीक आनी अर्थीक न्याया खातीर भारतीय लोकांक संविधान दिल्ले खातीर आमी कृतज्ञताय उक्तावया. आयच्या ह्या इतिहासीक प्रसंगार हांव आमच्या सैन्य दळांक नमन करतां, जीं आमचें स्वातंत्र्य आनी राष्ट्राचे अखंडतायेची देशभक्ती, समर्पीत भावना आनी पराक्रमान राखण करतात अशें राज्यपालांनी आपल्या संदेशांत म्हणलां.  
भारताच्या स्वातंत्र्याचें हें 75 वें वर्स आमी  ‘आझादी का अमृत महोत्सव’ म्हणून मनयतात आनी तें आमी समाजाच्या सगल्या वर्गातल्या लोकांच्या सहभागान स्वातंत्र्य चळवळ, देशाची प्रगती, आझादी का अमृत महोत्सव अशा संकल्पनांचेर विंगडविंगड कार्यावळी आयोजीत करून देशभर मनयतात. प्रधानमंत्र्यांनी हालींच आपल्या संदेशा वरवीं भारत देशांतल्या लोकांक स्वातंत्र्य सैनिकांच्या सपनांतलो भारत निर्माण करपाचो उलो मारला. फुडल्या 25 वर्सांत अमृत काळाची मोख सादपा खातीर तांणी कर्तव्य काळ अशें संबोधून लोकांक पुराय समर्पीत भावनेन आपलें पूर्ण करपाचो उलो मारला. फाटल्या 75 वर्साचो कार्यकाळ असामान्य आनी साबार घडणुकांचो आसा. आमी जिणेच्या सगल्या मळार जावं मागीर तें शेती उत्पादन, उद्देगीक वाड, भलायकी, शिक्षण, अणू ऊर्जा, अंतरीक्ष तंत्रज्ञान, म्हायती तंत्रज्ञान, स्टार्टअप हांचे बाबतींत भरीव प्रगती केल्या. आमची अर्थवेवस्था मजबूत आसा. खास करून फाटल्या 8 वर्सांच्या काळांत देशाच्या प्रशासनांत बदल, सुदारणा आनी प्रगती जाल्ली पळोवंक मेळटा. खास करून देशांत जाल्ली डिजिटल प्रगती तोखणायेची आसा आनी ह्या सगल्यां खातीर प्रधानमंत्री नरेंद्र मोदी हांच्या गतीमान आनी धिटायेच्या नेतृत्वाक सलाम. खऱ्यांनीच हो काळ देशाच्या इतिहासांतलो प्रगती आनी विकासाचो काळ आसा अशें राज्यपालांनी म्हणलां.
तोखणायेची गजाल म्हळ्यार आमी कोवीड-19 महामारीच्या संकटा आड येसस्वीपणान लढो दिलो. भारतान वासिनीकरणाचो आंकडो 200 कोटी पूर्ण केला. आमच्या तज्ञ संशोधकांनी सतत यत्न करून कोवीड-19 महामारी आड वासीन तयार केलें आनी प्रधानमंत्र्यांनी मारिल्लो आत्मनिर्भर भारताचो उलो पूर्ण केलो. देशान कोवीड-19 महामारी आड येसस्वीपणान दिल्लो लढो आनी आमचे शास्त्रज्ञ, दोतोर आनी भलायकी कर्मचाऱ्यांचे समर्पीत सेवेची सगल्या संवसारान तोखणाय केल्या. ही गजाल आमकां सगल्यां खातीर अभिमानाची. कोवीड-19 महामारीच्या लढ्यांतलें सगल्या लोकांचें आनी राज्यांचें सहकार्य आनी आदार हें भारत देशाच्या संघटीत आनी गतीमान लोकशाय प्रशासनाचे मजबुतीचें उदारण आसा. गोंयांत कोवीड महामारीची परिस्थिती बरे तरेन हाताळ्ळी. पात्र नागरिकांक डब्बल कोवीड डोस दिवपाचें काम पूर्ण जालां. राज्य सरकारान आतां सुमार 10 लाख लोकांक बुस्टर डोस दिवपाचेर लक्ष केंद्रीत केलां. हांव ह्या प्रसंगार सगल्या पात्र लोकांक उलो मारता की तांणी जाता तितले बेगीन लागींच्या भलायकी केंद्राचेर वचून बुस्टर डोस घेवचो. फाटल्या एका वर्सात गोंयांत दोन वेंचणुको जाल्यो. नवें सरकार वेंचपा खातीर मार्च्यांत विधानसभा वेंचणूक जाली आनी कांय दिसां पयलीं पंचायत वेंचणूक जाली. ह्यो दोनूय वेंचणुको मुक्त, सुरक्षीत आनी शांतिकायेच्या वातावरणांत घेतिल्ले खातीर हांव भारतीय वेंचणूक आयोग आनी राज्य वेंचणूक आयोगाची तोखणाय करतां अशें राज्यपालांनी म्हणलां.
मुख्यमंत्री डॉ. प्रमोद सावंत हांच्या कुशळ फुडारपणा खाला गोंय उदरगतीचीं पावलां फुडें मारीत आसा. राज्य सरकार केंद्र सरकाराच्या येवजणांची येसस्वीपणान अंमलबजावणी करपा वांगडाच गोंय लोकांच्या कल्याणा खातीर साबार येवजणो आनी उपक्रम चालीक लायता. per capita income  बाबतीत गोंयचें उंचेलें स्थान कायम आसा. अन्न सुरक्षेचे बाबतीत गोंय सतत चार वर्सा उत्कृश्ट राज्य आसा. तशेंच शाश्वत विकासाचे बाबतीत राज्य चवथ्या क्रमांकाचेर आसा. नितळ उदक, नितळसाण आनी परवडपी नितळ ऊर्जेची मोख गोंयान साध्य केल्या. NITI  आयोगाच्या नियाळांत राज्याक 5 वें स्थान फावो जालां. गोंयान फाटलें वर्स मुक्तीचें 60 वें वर्स मनयलें. प्रधानमंत्र्यांनी गोंयच्या लोकांनी केल्ले प्रगतीची तोखणाय केल्या. गोंयान ‘स्वयंपुर्ण गोंय’ मोहीम सुरू करून आत्मनिर्भरतायेचेर भर दिला. सरकार कल्याणकारी येवजणांची अंमलबजावणी करपा वांगडाच रोजगार निर्माण करपाक कुशळटाय विकास आनी युवा उद्देजकांक स्टार्ट अप सुरू करपाक प्रोत्साहन दिता. सरकारान उदका पुरवण, नितळसाण, वीज, रस्ते, पूल आनी हेर साधनसुविधांच्या मळार बरो विकास केला. नवो जुवारी पूल, मोपा विमानतळ ह्या सारके म्हत्वाचे प्रकल्प पूर्ण जावपाचे वाटेर आसात आनी तांचे रोखडेंच उक्तावण जातलें. गोंयाक  सैमीक सोबीतकाय, समृध्द जीवसृश्ट आनी संस्कृताय, शांतीकाय आनी सलोखो लाबला. गोंय संवसारभरांतल्या असंख्य पर्यटकांचें आकर्शण आसा. सरकारान सैम पर्यटनाचेर भर दिला. सैम पर्यटनांतल्यान पर्यावरणाचो सांबाळ करपा वांगडाच रोजगाराच्यो संदी निर्माण जातल्यो अशेंय राज्यपाल पिल्लई हांणी म्हणलां.
आयज पुराय देश भारतीय स्वातंत्र्याच्या 75 व्या वर्साचो उत्सव मनयता आसतना आमकां प्रगतीची आनीक उंचेली तेंगशी गाठपाची आसा हें आमी विसरपाक जायना. आमी आमचे घटनेचेर विस्वास दवरपाक जाय. अमृत काळ आनी आत्मनिर्भर भारताचें सपन पूर्ण करपाक सबका साथ, सबका विकास, सबका विस्वास, सबका प्रयास हे भावनेंतल्यान आमी सगलीं समर्पीतपणान एकवटान काम करपाचो सोपूत घेवया अशेंय राज्यपाल पी. एस. श्रीधरन पिल्लई हांणी आपल्या संदेशांत म्हणलां.