भांगरभूंय | प्रतिनिधी
पणजी : विधानसभा अधिवेशना खातीर बुधवारा सकाळीं काणकोणच्यान पर्वरे येतना सभापती रमेश तवडकार हांची गाडी झुवारी पुलार लॉक जावन कठड्याक आपटली. एअरबॅग उगडिल्ल्यान सभापतीं सयत गाडयेंत आशिल्ले स जाण वाटावले.
हे विशीं चड म्हायती प्रमाण, सभापती तवडकार अधिवेशना खातीर येताले. गाडयेंत सभापती मेळून स जाण आशिल्ले. वराक ७० किमी वेगान आशिल्ली तांची गाडी झुवारी पुलार अचकीत लॉक जाली आनी पुलाच्या कठड्याक आदळ्ळी. अपघाताक लागून गाडयेंतले एअरबॅग्स उघडले. ताका लागून कोणाक दुखापत जावंक ना. व्हड अपघातांतल्यान आपूण वाटवल्ल्याची म्हायती तांणी काल सांजेवेळार कांय जाणां कडेन उलयतना दिली.
आपली गाडी ह्या मार्गार १०० ते ११० किमी वेगान धांवता. मात बुधवारा ती ७० किमी वेगान आशिल्ली. स्पिड चड आशिल्ली जाल्यार गाडी कठड्याक धपको दिवन न्हंयेंतूय पडपाची शक्यताय आशिल्ली, अशेंय तांणी सांगलें.
मजगतीं, इतल्या व्हड अपघातांतल्या वाटवल्या उपरांत सभापती तवडकार हांणी विधानसभेंत दाखल जावन अपघाताचो कसलोच तांणी मुखामळार हाडिनासतना आपलें काम चालूच दवरलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
