सनातन धर्म जनरेशन झी मेरेन पावपाक जाय

भांगरभूंय | प्रतिनिधी

सोमनाथ पर्व 2026 च्या उक्तावण सुवाळ्यांत मुख्यमंत्र्याचो दावो

आदींच्या खंयच्याच पक्षान हिंदू धर्म, संस्कृतीचें रक्षण करूंक ना

दिवाडी जुंव्याचेर कोटी तीर्थ वाठारांत देवूळ बांदपाचें काम बेगिनूच

भांगरभूंय । प्रतिनिधी

पणजी : फुडले पिळगेक धर्मीक, सनातनी करपाचे आसा जाल्यार सनातन धर्म आनी संस्कृती आयज्या जनरेशन झी मेरेन पावपाक जाय. ते खातीर भाजप सरकार विवीध उपक्रम चालीक लायता, अशें मुख्यमंत्री डॉ. प्रमोद सावंत हांणी सांगलें. सोमारा पोरणें गोंया कला आनी संस्कृती खात्या वतीन आयोजीत सोमनाथ स्वाभिमान पर्व 2026 हे कार्यावळीच्या उक्तावण सुवाळ्यांत ते उलयताले. ह्या वेळार केंद्रीय मंत्री श्रीपाद नायक, आमदार राजेश फळदेसाय, खात्याचे संचालक विवेक नायक स्वामी नरेंद्राचार्य महाराज पिठाचे पदाधिकारी हाजीर आशिल्ले.

मुख्यमंत्र्यान सांगलें, भाजपाचें सरकार आयले उपरांत देशांत तशेंच राज्यांत धर्मीक आनी सांस्कृतीक उदरगत जाता. ते आदींच्या सरकारांनी केन्नाच हिंदू धर्माचें, संस्कृतीचें रक्षण करूंक ना. भाजप सरकारानूच राम मंदीर परतून बांदलें. गोंयांतल्या भाजप सरकारान लेगीत विवीध देवळां बांदलीं. तातूंत वेर्णाच्या म्हाळसा नारायणी देवी देवळाचो आस्पाव आसा. आदीं पर्यटक पोरणें गोंय म्हणकच फक्त चर्चींत भेटी दिताले, मात आतां थंयचीं देवळां चड करून गोवेश्वर देवळाक भेट दिवप्यांची संख्या वाडटा. ह्या देवळांत बारा ज्योतिर्लिंगाचें दर्शन एकेच सुवातेर करपाक मेळटा.

पुर्तुगेजांनी गोंयांतल्या सनातन धर्माचेर हल्लो केलो. लोक एकठांय येवचे न्हय, आपलो धर्म पाळचो न्हय हे खातीर तांणी हजारांनी देवळां मोडलीं. आपलो देव धर्म वाटावपा खातीर कितल्याश्याच गोंयकारांक हेर सुवातेचेर स्थलांतर करचें पडलें, अशें मुख्यमंत्र्यान सांगलें. पुर्तुगेजांनी उध्वस्त केल्ल्या देवळांचो उगडास म्हूण आमी दिवाडी जुंव्याचेर कोटी तीर्थ वाठारांत एक देवूळ बांदतले. ताचें काम बेगिनूच सुरू जातलें. सप्तकोटेश्वर देवळाचें नुतनीकरण करपाचें काम लेगीत आमच्याच काळांत जालें. प्रधानमंत्री नरेंद्र मोदी हांणी आयज देशभरांतल्यान सोमनाथ पर्वाची सुरवात केल्या. ताका लागून सनातन धर्माची वाड जावपाक मजत जातली, अशेंय मुख्यमंत्री डॉ. सावंत हांणी सांगलें.