भांगरभूंय | प्रतिनिधी
सनरायझर्स हैदराबादान इंडीनय प्रिमीयर लिगेच्या (आयपीएल) अंदूंच्या हंगामांत तिसऱ्या जैताची नोंद केली. ताणें येजमान पंजाब किंग्साक 2 धांवड्यांनी हारयलो.
सनरायझर्स हैदराबादान पयलीं बॅटींग करून निर्धारीत 20 ओव्हरींनी 9 विकेटी व्हगडावन 182 धांवड्यो केल्यो. मोखीचो फाटलाव करतना पंजाब किंग्साक निर्धारीत 20 ओव्हरींनी 6 विकेटी व्हगडावन 180 धांवड्यां मेरेन मजल मारप शक्य जालें.
शशांक सिंग आनी आशुतोष शर्मा हांणी परतून एकदां दोळे दिपकावपी प्रदर्शन करून पंजाबा खातीर अखेर मेरेन संघर्श केलो पूण, पंजाबाक अखेरेक फकत 2 धांवड्यांनी हार घेवची पडली.
पॅट कमिन्स आनी भुवनेश्वर कुमार हांणी पयल्या दोन ओव्हरींनी वळेरेन जॉनी बॅयरस्टो (0) आनी प्रभसिमरन सिंग (4) हांकां तंबूंत धाडले. भुवनेश्वराचे फुडले ओव्हरींत शिखर धवनाक जीवनदान मेळ्ळें. पूण, दोन बॉलां उपरांत हॅन्रिक क्लासेनान उत्कृश्ट रितीन स्टम्पींग करून पंजाबाक व्हड धपको दिलो. धवन 14 धांवड्यो करून परतून गेलो. बरी बॅटींग करपी सॅम करनाक (29) टी नटराजनान बाद केलो. शशांक सिंग आनी सिकंदर रझा हांणी लेगीत पंगडाक फावो तशी बॅटींग चालूच दवरिल्ली. पूण, जयदेव उनाडकटाच्या बॉलाचेर स्कूप करपाच्या यत्नांत सिकंदर (28) क्लासेनाच्या हातांत कॅच दिवन परतलो.
जितेश शर्माचें अपेस कालचे मॅचींत चालूच उरलें. ताका नितीश रेड्डीन बाद केलो.
24 बॉलांनी 67 धांवड्यांचें आव्हान पंजाबा मुखार आशिल्लें आनी आशुतोष आनी शशांक ही फाटले मॅचींत जैत मेळोवन दिवपी जोडी मैदानांत आशिल्ली. दोगांयनी पंजाबाची आस्त जिवी दवरली. तांणी मॅच 12 बॉलांनी 39 अशी लागी हाडली. टी नटराजनान 19वे ओव्हरींत 10 धांवड्यो दिल्यो. अशे तरेन पंजाबाक निमाण्या स बॉलांनी 29 धांवड्यो करपाच्यो आशिल्ल्यो.
जयदेवाच्या पयल्या बॉलाचेर जबरदस्त शॉर्ट मारलो. पूण, शिमे लागसार हैदराबादाच्या फिल्डरान कॅच सोडली आनी बॉल शिमे भायर गेल्ल्यान पंजाबाक सको मेळ्ळो. दोन वायड बॉला उपरांत दुसऱ्या बॉलाचेर पंजाबाक तसोच सको मेळ्ळो. फुडल्या दोन बॉलांचेर दरेकी दोन धांवड्यो आयिल्ल्यान दोन बॉलांनी 19 धांवड्यो अशें समीकरण जालें. बॉलरान परतून वायड घालो. पांचव्या बॉलाचेर परतून एक कॅच सुटली. अखेरेक पंजाबाक जैत जोडपाक दोन धांवड्यो उण्यो पडल्यो.
ते पयलीं पंजाब किंग्साच्या बॉलरांनी उत्कृश्ट बॉलींग घाली खरी.पूण, सनरायझर्स हैदराबादाचो 20 वर्सां पिरायेचो नितीश कुमार रेड्डी हाणें आक्रमक बॅटींग केली. सनरायझर्स हैदराबादाचे दिग्गज खेळगडे अपेशी थारल्या उपरांत तांकां उण्या धांवसंख्येचेर आडावपाक येसस्वी थारतले अशें पंजाबाक दिशिल्ले. नितीश कुमार रेड्डीन पंजाबाच्या बॉलरांची बॉलींग फोडून काडली. ताच्या अर्द शेंकड्याच्या नेटार हैदराबादान मॅचींत पुनरागमन केलें आनी पंजाबा मुखार खर आव्हान दवरलें.
ते पयलीं पंजाबान टॉस जिखून पयलीं फिल्डिंग करपाचो निर्णय घेतलो. कगिसो रबाडान घाल्ल्या पयल्याच बॉलाचेर ट्रेव्हिस हेडा आड कॅच बाद जाल्ल्याचें अपील केलें. पूण, डीआरएस घेवंक नाशिल्ल्यान हेडाक जीवनदान मेळ्ळें. ते उपरांत हेडान रबाडाचे फुडले ओव्हरींत सेगीत तीन चवके मारले. अर्शदीप सिंगान आपले पयले ओव्हरींत पंजाबाक व्हड विकेट मेळोवन दिली. ताणें हेडाक (21) बाद केलो. व्हड शॉर्ट खेळपाच्या यत्नांत हेड मिड ऑफाक उबो आशिल्ल्या धवनान धांवत वचून कॅच धरली. अर्शदीपान एका बॉलाच्या अंतरान एडन मार्करमाक (0) बाद करून हैदराबादाक आनीक धपको दिलो. मार्करम बाद जालो त्या वेळार हैदराबादाच्यो 27 धांवड्यो जाल्ल्यो.
राहुल त्रिपाठी आनी नितीन कुमार रेड्डी हाणें हैदराबादाक आस्त दाखयिल्ली. पूण, हर्षल पटेलान ही जोडी फोडली. राहुल वैयक्तीक 11 धांवड्यांचेर बाद जालो. हॅन्रीच क्लासेन (9) काल अपेशी थारलो. ताका हर्षल पटेलान बाद केलो. पूण, दुसरे वटेच्यान नितीशान डाव सांबाळून धरिल्लो. ताणें 32 बॉलांनी अर्द शेंकडो पुर्ण केलो. 55 धांवड्यांचेर शशांक सिंगान ताची कॅच सोडली. नितीश आनी अब्दुल समद हांणी 20 बॉलांनी केल्ली 50 धांवड्यांची भागिदारी अर्शदीपान फोडली.
समदान 12 बॉलांनी 25 धांवड्यो केल्यो. परत एकदा एका बॉलाच्या अंतरान अर्शदीपान नितीशाक बाद केलो. नितीश 37 बॉलांनी चार चवके आनी पांच सक्यांचे मजतीन 64 धांवड्यो करून बाद जालो. ते उपरांत रबाडान पॅट कमिन्साक (3) बाद केलो. अर्शदीप सिंगान 29 धांवड्यो दिवन 4 विकेटी घेतल्यो, रबाडा, सॅम करन आनी हर्षल पटेल हाणें दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
