सनरायझर्स हैदराबादाक जैत

भांगरभूंय | प्रतिनिधी

सनरायझर्स हैदराबादान अंदूंच्या इंडीयन प्रिमीयर लिगेंतलें पयलें जैत जोडलें. ताणें मुंबय इंडियन्साक 31 धांवड्यांनी हारयलो. हैदराबादान आयपीएलाच्या इतिहासांतलो सर्वोच्च स्कोर उबारलो. ताणें रॉयल चॅलेंजर्स बंगळुरूचो विक्रम मोडलो. बंगळुरून 2013त पुणे वॉरियर्सा आड 263 धांवड्यो केल्ल्यो.

हैदराबादान दिल्ले 278 धांवड्यांचे मोखीचो फाटलाव करतना मुंबय इंडियन्सान 5 विकेटी वगडावन 246 धांवड्यो केल्यो. पॅट कमिन्स आनी जयदेव उनाडकट हाणें दरेकी 2 विकेटी घेतल्यो. 

हैदराबादान धांवड्यांचो दोंगर उबारल्या उपरांत मुंबय इंडियन्सान खर संघर्श केलो. ओपनर इशान किशन आनी तिलक वर्मा हांणी उत्कृश्ट खेळी करून मॅचींत उमळशीक हाडली. पूण, व्हड मोखीचो फाटलाव करपाक मुंबय इंडियन्साक अपेस आयलें.

मुंबयक निमाण्या 12 बॉलांनी जैता खातीर 54 धांवड्यांची गरज आशिल्ली. हैदराबादाचो मुखेली पॅट कमिन्सान 19वी ओव्हर घाली. पयल्या बॉलाचेर एक आनी दुसऱ्या बॉलाचेर दोन धांवड्यो मेळ्ळ्यो. तिसऱ्या बॉलाचेर दोन धांवड्यो आयल्यो. आतां 9 बॉलांनी 50 धांवड्यांची गरज आशिल्ली. कमिन्सान उत्कृश्ट बॉलींग करून आपल्या पंगडाक जैताच्या लागसार व्हेलो.

निमाणे ओव्हरींत मुंबयक 47 धांवड्यांची गरज आशिल्ली. आतां फकत औपचारिकताय उरिल्ली. पूण, टीम डॅव्हिडान मयंक मार्कंडेयच्या पयल्या बॉलाचेर 1 धांवडी घेतली. दुसऱ्या बॉलाचेर शेफर्डान सको मारलो. पूण, तिसऱ्या बॉलाचेर एकूय धांवडी येवंक ना. चवथ्या बॉलाचेर चार धांवड्यो आयल्यो. दोन बॉलांनी 36 धांवड्यांची गरज आसतना आनीक एक चवको आयलो. निमाण्या बॉलाचेर एकूय धांवडी आयली ना आनी अशे तरेन मुंबयक 31 धांवड्यांनी हार घेवची पडली.

ते पयलीं टॉस हारल्या उपरांत पयलीं बॅटींग करपी सनरायझर्स हैदराबादान धांवड्यांचो दोंगर उबारलो. ट्रॅव्हिस हेड, अभिषेक शर्मा आनी हॅन्रीक क्लासेन ह्या त्रिकुटान मुंबय इंडियन्साच्या बॉलरांची बॉलींग फोडून काडली. विशेश गजाल म्हणल्यार आयपीएलाच्या इतिहासांत सर्वोच्च धांवसंख्या उबारून हैदराबादान इतिहास घडयलो. ताणें निर्धारीत 20 ओव्हरींनी 3 विकेटी वगडावन 277 धांवड्यो केल्यो.

मयंक अग्रवाल (11) सवाय भितर बाद जाल्या उपरांत ट्रॅव्हिस हेड आनी अभिषेक शर्मा हांणी जापसालदारकी सांबाळ्ळी. तांणी आक्रमक खेळी करून मुंबय इंडियन्साची बॉलींग फोडून काडली. हेडान तीन सके आनी णव चवक्यांचे मजतीन 24 बॉलांनी 62 धांवड्यो केल्यो. जाल्यार अभिषेक शर्मान 23 बॉलांनी 63 धांवड्यो केल्यो. हातूंत सात सक्यांचो आनी तीन चवक्यांचो आस्पाव आशिल्लो.

एडेन मार्करम आनी हॅन्रीक क्लासेन हाणें लेगीत व्हांवते गंगेंत हात धुंवन घेतले. मार्करमान एक सको आनी दोन चवक्यांचे मजतीन 28 बॉलांनी नाबाद 42 धांवड्यो केल्यो. जाल्यार हॅन्रीक क्लासेनान सात सके आनी चार चवके मारून 34 बॉलांनी 80 धांवड्यो केल्यो.

सनरायझर्स हैदराबादाच्या बॅट्समनांनी मुंबयच्या सगल्याक बॉलरांची बॉलींग फोडून काडली. क्वेना मफाकान चार ओव्हरींनी वट्ट 66 धांवड्यो दिल्यो. मुखेली हार्दीक पांड्यान चार ओव्हरींनी 1 विकेट घेवन 46 धांवड्यो दिल्यो. जाल्यार जसप्रीत बुमरान सुरवातीच्यो दोन ओव्हरी बऱ्यो घाल्यो आनी चार ओव्हरींनी एकूय विकेट घेनासतना 36 धांवड्यो दिल्यो. गेराल्ड कोएत्झीन चार ओव्हरींनी 1 विकेट घेवन 58 धांवड्यो दिल्यो. पियुष चावलान दोन ओव्हरींनी 34 धांवड्यो दिल्यो. शम्स मुलाणीच्या दोन ओव्हरींनी 33 धांवड्यो आयल्यो.

मजगतीं, दोनूय पंगडांनी हे मॅची खातीर आपल्या पंगडांत बदल केलो. हैदराबादान आपल्या निमाण्या इकरांत ट्रॅव्हिड हेड आनी जयदेव उनाडकट हांचो आस्पाव केलो, जाल्यार मुंबय इंडियन्सान ल्युक वुडाचे सुवातेर क्वेना मपाकाचो आस्पाव केलो.