सनरायझर्साचें झणझणीत जैत

भांगरभूंय | प्रतिनिधी

इंडीयन प्रिमीयर लिगेचे (आयपीएल) 35वे मॅचींत सनरायझर्स हैदराबादान येजमान दिल्ली कॅपिटल्सा आड 67 धांवड्यांनी झणझणीत जैत जोडलें. हैदराबादान दिल्ले 267 धांवड्यांचे मोखीचो फाटलाव करपी दिल्ली कॅपिटल्साक 19.1 ओव्हरींनी सगल्यो विकेटी व्हगडावन 199 धांवड्यो करप शक्य जाल्यो.

दिल्ली मुखार व्हड मोख आशिल्ली. 22 वर्सां पिरायेचो जॅक फ्रेझर-मॅकगर्कच्या वादळान हैदराबादाचेर मात्शें चेपण आयलें. ऋषभ पंतान लेगीत कांय आकर्शक शॉर्ट खेळ्ळे. पूण, दिल्लीक जैत मेळोवन दिवपाक ते उणें पडले.

दिल्लीची सुरवात बरी जाली नासली तरी जॅकान आक्रमक बॅटींग करून मॅचींत उमळशीक हाडली. ताणें दिल्ली वतीन आयपीएलाच्या इतिहासांतलो सगल्यांत जलद आनी वट्ट तिसरो जलद अर्द शेंकडो नोंदयलो. डॅव्हिड वॉर्नराक (1) अपेस आयलें. पृथ्वी शॉ हाणें पांच बॉलांनी 16 धांवड्यो केल्यो. पूण, वॉशिंग्टन सुंदरान ताची खेळी सोंपयली. जॅक आनी अभिषेक पोरेल हाणें दिल्लीचो डाव सांबाळ्ळो आनी 30 बॉलांनी 84 धांवड्यो केल्यो. जॅक 18 बॉलांनी पांच चवके आनी सात सक्यांचे मजतीन 65 धांवड्यो करून बाद जालो. ताच्या फाटोफाट अभिषेक 22 बॉलांनी सात चवके आनी एका सक्याचे मजतीन 42 धांवड्यो करून परतलो.

हैदराबादाचो मुखेली पॅट कमिन्सान बॉलिंगेंत योग्य बदल केलो आनी ताचो हैदराबादाक फायदो जालो. नितीश रेड्डी आनी टी नटराजन हाणें वळेरेन त्रिस्तान स्तब्स (10) आनी ललित यादव (7) हाका बाद करून दिल्ली अवस्था 6 बाद 166 अशी केली. पंत आनी अक्षर पटेल ही जोडी दिल्ली खातीर निमाणी आस्त आशिल्ली. पटेल (6) नटराजनाच्या फुलटॉसाचेर बाद जालो. तेच ओव्हरींत नटराजनान एन्रिच नॉर्खियाक बोल्ड केलो आनी कुलदीप यादवाक एलबीडब्ल्यू बाद केलो. नटराजनान 19 धांवड्यो दिवन 4 विकेटी घेतल्यो. नितीश बाद जालो आनी दिल्लीचो डाव 199चेर सोंपलो.

ट्रॅव्हिस हेड आनी अभिषेक शर्मा हांचे आक्रमक बॅटिंगेन अरूण जेटली मैदान गाजयलें. ह्या दोगांचे बॅटिंगे नेटार सनरायझर्स हैदराबादान टी-20 क्रिकेटीच्या इतिहासांत पॉवर प्लेंत सर्वोच्च धांवसंख्या उबारली.

चायनामॅन कुलदीप यादवान चार विकेटी घेवन दिल्ली कॅपिटल्साक पुनरागमन करून दिलें. पूण, सनरायझर्स हैदराबादाक व्हड धांवसंख्या उबारपाक ते आडावपाक शकले नात. आयपीएलाच्या इतिहासांत तीन खेपे 250 परस चड धांवसंख्या उबारपी हैदराबाद पयलोच पंगड थारलो.

खलिल अहमदाच्या दुसऱ्या बॉला सावन तांणी सके आनी चवक्यांचो पावस घालो. ती थेट सातवे ओव्हरी मेरेन चालूच उरली. सात ओव्हरींत हेडान 16 बॉलांनी अर्द शेंकडो पुर्ण केलो. हैदराबादान 2.4 ओव्हरींनी विक्रमी पन्नास धांवड्यो केल्यो आनी 4.5 ओव्हरींनी रॅकॉर्ड ब्रेकींग 100 पुर्ण केल्यो.

हेड आनी शर्मा हांणी 125 धांवड्यो पयल्या स ओव्हरींनी करून नवो विक्रम नोंदयलो. अखेरेक हें वादळ कुलदीपान आडायलें. ताणें अभिषेक शर्माक बाद करून ही जोडी फोडली. अभिषेकान 12 बॉलांनी 2 चवके आनी स सक्यांचे मजतीन 46 धांवड्यो केल्यो. अक्षर पटेलान उत्कृश्ट रितीन कॅच धरली आनी 131 धांवड्यांची ही भागिदारी फुटली.

तेच ओव्हरींत कुलदीपान हैदराबादाक दुसरो धपको दिलो. ताणें एडेन मार्करमाक (1) बाद केलो. हेडाक बाद करून कुलदीपान दिल्ली कॅपिटल्साक थाकाय दिवपी विकेट मेळोवन दिली. हेडान 32 बॉलांनी 11 चवके आनी स सक्यांचे मजतीन 89 धांवड्यो केल्यो. अक्षरान 10वे ओव्हरींत हॅन्रीच क्लासेनाक (15) बोल्ड करून दिल्लीक चवथें येस मेळोवन दिलें.

जबरदस्त सुरवाती उपरांत हैदराबादान 23 धांवड्यांनी 4 विकेटी व्हगडायल्यो. तातूंतल्यो तीन विकेटी कुलदीपान मेळयिल्ल्यो. हे विकेटी उपरांत हैदराबादाची धांवांची गती कांय प्रमाणांत उणी जाली.

नितीश कुमार रेड्डी आनी शाहबाज अहमद हांणी 14.5 ओव्हरींनी पंगडाच्यो दोनशें धांवड्यो पुर्ण केल्यो. आयपीएलाच्या इतिहासांतल्यो ह्यो चवथ्यो जलद दोनशें धांवड्यो थारल्यो.

रॉयल चॅलेंजर्स बंगळुरून 2016त पंजाब किंग्सा आड 14.1 ओव्हरींनी 200 धांवड्यो पुर्ण केल्ल्यो. ते उपरांतच्यो तिनूय जलद 200 धांवड्यो ह्यो हैदराबादाच्या नांवार नोंद आसात. अंदूं मुंबय इंडियन्सा आड 14.4 ओव्हरींनी, काल दिल्ली आड 14.5 ओव्हरींनी आनी अंदूंच तिसरे खेपे रॉयल चॅलेंजर्स बंगळुरू आड 15 ओव्हरींनी 200 धांवड्यो पुर्ण केल्ल्यो.

बॉलाचेर नदर बसयल्या उपरांत नितीश आनी शाहबाज हांणी हात मेकळे करपाक सुरवात केली. कुलदीपान आनीक एक धपको दितना रेड्डीक (36) बाद केलो. कुलदीपान चार ओव्हरींनी 55 धांवड्यो दिवन 4 विकेटी घेतल्यो. शाहबाजान 29 बॉलांनी नाबाद 59 धांवड्यो केल्यो आनी पंगडाक निर्धारीत 20 ओव्हरींनी 7 बाद 266 धांवड्यां मेरेन मजल मारून दिली.