भांगरभूंय | प्रतिनिधी
इंडीयन प्रिमीयर लिगेच्या (आयपीएल) इतिहासांतल्या सर्वोच्च धांवसंख्येचो फाटलाव करपाचो खर यत्न रॉयल चॅलेंजर्स बंगळुरून केलो. सनरायझर्स हैदराबादाच्या 287 धांवड्यांक जाप दिवपी बंगळुरून उत्कृश्ट रितीन सुरवात केल्ली. पूण, विराट कोहलीची विकेट पडली आनी बंगळुरूची गाडी रुळा वयल्यान घसरली. हैदराबादाचो मुखेली पॅट कमिन्साची तोखणाय करपाक जाय. ताणें आपल्या अणभवाच्या नेटार तीन म्हत्वाच्यो विकेटी घेवन मॅच घुंवडायली. पूण, परतून एकदा दिनेश कार्तिकान अखेर मेरेन संघर्श केलो. पूण, पंगडाक इतिहासीक जैत मेळोवन दिवपाक तो चुकलो.
हैदराबादान पयलीं बॅटींग करतना 3 विकेटी वगडावन 287 धांवड्यो केल्यो, ताका जाप दितना बंगळुरून 7 विकेटी वगडावन 262 धांवड्यो केल्यो आनी अशे तरेन हैदराबाद 25 धांवड्यांनी जैत जोडलें.
विराट कोहली आनी मुखेली फाफ ड्युप्लेसीसान बंगळुरूक अपेक्षीत सुरवात करून दिली. दोगांयनी 6.2 ओव्हरींनी 80 धांवड्यो केल्यो. ही जोडी मयांक मार्कंडेन हाणें फोडली. ताणें कोहलीक बोल्ड केलो. कोहलीन 20 बॉलांनी स चवके आनी दोन सक्यांचे मजतीन 42 धांवड्यो केल्यो. विल जॅक्स (7) धांवबाद जालो. मार्कंडेन रजत पाटीदाराक (9) बाद केलो. हैदराबादा खातीर ड्युप्लेसीसाच्या रुपान एक आडखळ आशिल्ली. कमिन्सान 10वे ओव्हरींत ही आडखळ लेगीत पयस केली. ड्युप्लेसीस 28 बॉलांनी सात चवके आनी चार सक्यांचे मजतीन 62 धांवड्यांचेर कॅच बाद जालो. कमिन्सान तेच ओव्हरींत सौरव चौहानाक बाद करून बंगळुरूची स्थिती बिनबाद 80 वयल्यान 5 बाद 122 अशी जाली.
महिपाल लाम्रोर आनी कार्तिक हांणी 25 बॉलांनी 59 धांवड्यांची भागिदारी करून बंगळुरूची आस्त जिवी दवरली. पूण, कमिन्सान परतून एकदा जमिल्ली जोडी फोडली. ताणें महिपालाक (19) बोल्ड केलो. कार्तिकान एक बाजू सांबाळून धरिल्ली. 18 बॉलांनी 72 धांवड्यो करून कठीण काम ताणें हातांत घेतलें. पूण, भुवनेश्वरान 18वे ओव्हरींत फकत 14 धांवड्यो दिल्यो. 12 बॉलांनी 58 धांवड्यांची गरज बंगळुरूक आशिल्ली. 19वे ओव्हरींत कार्तिकाचे खेळीक टी नटराजनान ब्रेक लायलो. कार्तिकान 34 बॉलांनी पांच चवके आनी सात सक्यांचे मजतीन 83 धांवड्यांची खेळी केली. बंगळुरून निर्धारीत 20 ओव्हरींनी 7 विकेटी वगडावन 262 मेरेन मजल मारली. मॅचींत वट्ट 549 धांवड्यांची नोंद जाली.
ते पयलीं रॉयल चॅलेंजर्स बंगळुरू बॉलरांची बॉलींक काल फोडून काडली. सनरायझर्स हैदराबादाचो दरेक बॅट्समन चवक्या-सक्या बगर दुसरे कसलीच भास उलयनाशिल्लो आनी ताका लागून विराट कोहली सयत रॉयल चॅलेंजर्स बंगळुरूचे सगले खेळगडे आनी चाहते निर्शेल्ले दिसले.
ट्रेव्हिस हेड आनी अभिषेक शर्मा हांणी 7.1 ओव्हरींनी 100 धांवड्यो केल्यो. ते उपरांत ट्रेव्हिस हेडान 39 बॉलांनी शेंकडो नोंदयलो. ते उपरांत हॅन्रिच क्लासेनान सगलीं सुत्रां आपल्या हातांत घेतलीं. अंदूंच्या हंगामांत सनरायझर्स हैदराबादान मुंबय इंडियन्सा आड 277 धांवड्यो करून आयपीएलाच्या इतिहासांतली सर्वोच्च धांवसंख्या उबारिल्लो. हो विक्रम हैदराबादानूच मोडलो.
हेडान 20 बॉलांनी अर्द शेंकडो पुर्ण केलो. ताका अभिषेकाची बरी साथ मेळ्ळी. ही जोडी रिसे टॉपलीन फोडली. णववे ओव्हरींत अभिषेकान स्क्वॅर लेगाचे दिकेन बॉल मारलो. पूण, फर्ग्युसनान ताची कॅच धरली. अभिषेकान 22 बॉलांनी दोन चवके आनी दोन सक्यांचे मजतीन 34 धांवड्यो केल्यो. बाद जावचे पयलीं अभिषेकान हेडा वांगडा मेळून पयले विकेटी खातीर 49 बॉलांनी 108 धांवड्यांची भागिदारी केली. ही जोडी फुडली म्हणून चवके आनी सके येवपाचे थांबले ना. पंगड वेवस्थापनान क्लासेनाक बडती दिवन तिसरे सुवातेर धाडलो. पंगड वेवस्थापनाचो ताणें हो निर्णय योग्य थारायलो. दुसरे वटेन हेडाचो पावर प्ले चालूच आशिल्लो. ताणें फकत 10 ओव्हरींनी पंगडाचो स्कोर 128 मेरेन पावयलो.
हेडान 39 बॉलांनी शेंकडो पुर्ण केलो. आयपीएलाच्या इतिहासांत हो चवथो जलद शेंकडो थारलो. 2013त क्रिस गेलान पुणे वॉरियर्सा आड 30 बॉलांनी शेंकडो नोंदयिल्लो. युसुफ पठाणान 37 बॉलांनी मुंबय इंडियन्सा आड, जाल्यार डॅव्हिड मिलरान 38 बॉलांनी रॉयल चॅलेंजर्स बंगळुरू आड जलद शेंकडो नोंदयिल्लो.
अखेरेक ल्युकी फर्ग्युसनान हेडाक बाद केलो. हेडान 41 बॉलांनी णव चवके आनी आठ सक्यांचे मजतीन 102 धांवड्यो केल्यो. क्लासेना वांगडा मेळून ताणें दुसरे विकेटी खातीर 26 बॉलांनी 57 धांवड्यांची भागिदारी केली.
हेड बाद जाल्या उपरांत क्लासेनान हात मेकळे केले. ताणें धांवड्यांचो वेग कायम राखलो. ताणें 23 बॉलांनी अर्द शेंकडो पुर्ण केलो आनी हैदराबादाक 15 ओव्हरींनी 205 मेरेन पावयलो.
क्लासेनाची खेळी 17वे ओव्हरींत थांबली. ताका फर्ग्युसनान बाद केलो. क्लासेनान 31 बॉलांनी दोन चवके आनी सात सक्यांचे मजतीन 67चेर बाद जालो. यश दयालाच्या फुटटॉसाचेर एडन मार्करम कॅच बाद जालो. पूण, तो बॉल नो बॉल थारलो. अब्दुल समद हाणें 19 वे ओव्हरींत तीन चवके आनी दोन सके मारून पंगडाचो स्कोर 266 मेरेन पावयलो. ते उपरांत मार्करमान स्कोर करपाचो वेग वाडयलो ताका लागून 277 धांवड्यांचो टप्पो हुपपाक हैदराबादाक येस आयलें.
बंगळुरूच्या ल्युकी फर्ग्युसनान 52, रिसे टॉप्लीन 68, यश दयालान 51 धांवड्यो दिल्यो. एकाच हंगामांत दोन खेपे 250चो आंकडो हुपपी हैदराबाद पयलो पंगड थारलो. हैदराबादान 20 ओव्हरींनी 3 विकेटी व्हगडावन 287 धांवड्यो केल्यो. मार्करम 17 बॉलांनी 32 आनी समद 10 बॉलांनी 37 धांवड्यो करून नाबाद रावलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
