भांगरभूंय | प्रतिनिधी
ग्रामसभा आपयात आमी कशेच ओगी बसचे नात : नागरिकांची शिटकावणी
पेडणें : धारगळच्या नियोजीत सनबर्न महोत्सवा खातीर धारगळ पंचायत मंडळाचे बसकेंत पांच आड चार मतांनी थाराव मंजूर जाल्ल्यान नागरीक तिडकल्यात. विरोधी पंच वांगड्यांनीय जो निर्णय घेवपाचो आसा तो खास ग्रामसभा आपोवन घेवचो, अशी मागणी केली. ग्रामसभेंत जर लोकांक हो सनबर्न जाय जाल्यार आमची हरकत ना, अशें मत आदले सरपंच तशेंच आतांचे पंच वांगडी भूषण नायक, आदले सरपंच अनिकेत साळगांवकार, पंच वांगडी अमिता हरमलकार हांणी मांडलें.
ह्या वेळार धारगळे पंचायतीची बसका सुरू जावचे पयलींच व्हडा प्रमाणां पुलीस तैनात केल्ले. ताका लागून ह्या वाठारांत नेमकें कितें चल्लां? हें कोणाकूच कळनाशिल्लें. नियोजीत सनबर्न महोत्सवा आड १ तारखेक पेडणेचे आमदार प्रवीण आर्लेकार हांच्या फुडारपणा खाला शेंकड्यांनी नागरिकांनी ह्या महोत्सवाक विरोध केल्लो. तेन्नाच सर्वपक्षीय थळाव्या फुडार्यांनी हाजेरी लावन आमदार प्रवीण आर्लेकार हांकां परबीं भेटोवन महोत्सवाक पूर्ण विरोध केल्लो. दुसरे वटेन कांय थळावे नागरीक आनी सत्तारूढ पंचायत मंडळ, सरपंच, उपसरपंच, पंच वांगडी महोत्सवाक फाटबळ दिवपाक बसकेक हजर राविल्ले.
२ तारखेक धारगळ पंचायत मंडळाची बसका जाल्ली आनी हे बसकेक सनबर्नाक परवानगी दिवपाच्या विशयाचेर चर्चा जाली. ह्या वेळार सत्तारूढ गटांतल्या पांच वांगड्यांनी सनबर्नाक परवानगी दिवपाचो थाराव मांडलो. जाल्यार चार विरोधी पंच वांगड्यांनी आमचो विरोध आशिल्ल्यान खासा ग्रामसभा आपोवपाक लायली. हे ग्रामसभेंत जर लोकांक सनबर्न जाय आनी ते पुरायेन फाटबळ दिता जाल्यार आमची कांयच हरकत ना. मात लोकांक विस्वासांत घेनासतना पंचायत मंडळान जो थाराव मंजूर केला तो आमकां अमान्य आशिल्ल्यान जेन्ना सनबर्न जातलो तेन्ना आमी आमदारा वांगडा थंय वचून तो बंद उडयतले, अशी शिटकावणी आदले सरपंच भूषण उर्फ प्रदीप नायक, अनिकेत साळगांवकार ह्या पंचायत वांगड्यांनी पत्रकारां कडेन उलयतना दिली.
ह्या वेळार हाजीर आशिल्ल्या नागरिकांनी प्रतिक्रिया उक्तायतना सत्तारूढ पंचायत मंडळाक पाकिटां मेळ्ळ्यां आसतलीं, म्हणून ते सरकार आनी सनबर्ना वटेन रावल्यात असो दावो केलो. आमी निमाणे मेरेन ओगी बसचे नात, अशीय शिटकावणी तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
