भांगरभूंय | प्रतिनिधी
कायद्यांची म्हायती कोंकणींतल्यान दिवपाचीय केली मागणी
मडगांव, प्रतिनिधी ः बऱ्या कामां खातीर लोक जाती- धर्म सोडून एकठांय येतात हें फाटल्या लोकसभा वेंचणुकेंत दिसून आयलां. तेच प्रमाण सनबर्न फेस्टिवल दक्षीण गोंयांतल्यान भायर काडपा खातीर थळाव्या लोकांचो एकवट आसतलो. राज्य सरकारान सनबर्नाचे आयोजन करुन लोकांक रस्त्यार देंवपाक लावचें न्हय अशी मागणी ॲड. राधाराव ग्रासियस हांणी केला.
ॲड. ग्रासियस हांणी सांगलें, उत्तर गोंयांत 15 वर्सां जालीं सनबर्न फेस्टिवल जाता. थंय कांय समस्या निर्माण जाल्ल्यान दक्षीण गोंयांत हाडपाचो यत्न सुरू आसा. सनबर्न फेस्टिवलाचो संबंद सदांच ड्रग्सां कडेन आसता. हो उत्सव बरो आसत जाल्यार तो प्रधानमंत्री मोदी हांच्या गुजरातांत स्थलांतरीत करचो. गोंयाक ह्या फेस्टिवलाची गरज ना. सनबर्नाक दक्षीण गोंयांतल्यान विरोध जातलो हें निश्चीत. सनबर्न जावचो न्हय हे खातीर थळाव्या पंचायतीं कडल्यान थाराव घेवन राज्य सरकाराक धाडचो. दक्षीण गोंयांतले रस्ते अशीर आसात, सनबर्नचो संबंद ड्रग्सा कडेन लायतात आनी डिसेंबरांत नाताळ आशिल्ल्यान व्हड प्रमाणांत पर्यटक गोंयांत येतात. बेतुल ओएनजीसी, सांकवाळ पठार अश्या वाठारांनी सनबर्न करचो न्हय. हाका लागून येरादारीची कोंयडी वाडटली. हाचे भायर पर्यटकांकय त्रास जातलो.
कायद्यांची म्हायती कोंकणींतल्यान दिवपाची
केंद्र सरकारान जुलया सावन नवे कायदे चालीक लायल्यात. भारतीय न्याय संहितेच्या नव्या कायद्यांची म्हायती मराठी, हिंदी, तमिळ, इंग्लीश अशा वेगवेगळ्या भारतीय भाशांनी मेळटात. पूण अजूनय कोंकणी भाशेंत ह्या कायद्यांची म्हायती खंय दिसना. ह्या कायद्यां विशीं म्हायती देशांतल्या दरेक प्रादेशिक भाशेंतल्यान दितना सामान्य लोकांक कायदो समजून घेवपा खातीर ताची म्हायती कोंकणी भाशेंतल्यान दिवची अशीं मागणी ॲड. ग्रासियस हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
