भांगरभूंय | प्रतिनिधी
पणजी : साबार सरकारी खात्यांनी मेळून 3500 पदां रितीं आसात. हातूंतलीं 1500 पदां भरपाची प्रक्रिया सुरू आसा. हेर 2 हजार पदां भरपा खातीरच्यो जायराती हाचे फुडें पांवड्या पांवड्यान जारी जातल्यो. कार्मीक तशेंच कर्मचारी भरती आयोगाच्या गोपां कडल्यान ही म्हायती मेळ्ळ्या.
सरकारी खात्यांनी क गटांतल्या पदांची भरती करपा खातीर कर्मचारी भरती आयोगाची स्थापना जाल्या. सरकारी शाळा, विद्यालयांनी शिक्षक, एलडीसी, यूडीसी, स्टेनोग्राफर, पंचायत सचीव, तलाठी, पुलीस शिपाय, पुलीस उपनिरिक्षक, कनिश्ठ अभियंते, मिटर रिडर, लायन हेल्पर, लॅबोरेटरी असिस्टंट ह्या सगल्या पदांची भरती आयोगा वतीन जाता. अंदूं साबार सरकारी खात्यांनी रित्या आशिल्ल्या 3500 पदांची वळेरी आयोगाक सादर केल्या. कांय पदां विशीं आयोगान संबंदीत खात्यां कडेन स्पश्टीकरण मागलां. हें स्पश्टीकरण आयले उपरांत पदांचो आंकडो निश्चीत जातलो. तरी लेगीत आतां मेरेन 1500 पदां भरपा खातीरची प्रक्रीया सुरू जाल्या. जायराती उपरांत सीबीटी परिक्षा जावन कांय पदांच्या परिक्षेचो निकाल जाहीर जाला. हेर 2 हजार पदां भरपा खातीरची प्रक्रिया सुरू जातली. येरादारी संचालनालय, उत्तर गोंय जिल्होधिकारी कार्यालय, नागरी पुरवण खातें, पुराभिलेख खातें, कॅप्टन ऑफ पोर्ट, खण संचालनालय, वीज खातें, पंचायत संचालनालय, कला आनी संस्कृती संचालनालय, भौशीक बांदकाम खातें, दक्षीण गोंय जिल्होधिकारी कार्यालय, न्हंय येरादारी खातें, कुशळटाय संचालनालय, वेवसायीक शुल्क खातें, म्हायती आनी प्रसिद्दी, शेतकी संचालनालय, पर्यटन संचालनालय, तंत्रीक शिक्षण संचालनालय ह्या खात्यांनी पदां रितीं आसात. भलायकी संचालनालया कडल्यान मात रित्या पदांचो आंकडो आयोगा कडेन येवंक ना. अंदूं जानेवारींत मराठी शिक्षकां खातीर 352 जाल्यार कोंकणी शिक्षकां खातीर 38 पदांची जायरात जारी जाली. ह्या पदां खातीर दोनूय सीबीटी परिक्षा जावन निकाल जाहीर जाला. हाचे उपरांत हवालदारांच्या 590 पदां सयत 722 पदांची जायरात जारी जाली. ह्या पदांची भरती प्रक्रिया सुरू जाल्या. चडशा पदां खातीरच्यो परिक्षा जाल्ल्यान आतां हेर पदां खातीरच्यो जायराती जारी जातल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
