सध्याच्या पदाचेरूच खूश

भांगरभूंय | प्रतिनिधी

सभापती रमेश तवडकारः खंयचेच राजकी सर्तींत नाशिल्ल्याचो दावो

भांगरभूंय । प्रतिनिधी

काणकोणः काणकोणचे आमदार तशेंच सभापती रमेश तवडकार हांची धडपड, कामाची उर्जा, दिल्लीच्या अधिकाऱ्यां कडेन लागींचे संबंद, भाजपाच्या वरिश्ठ फुडाऱ्यां कडले संबंद, आदिवासी समाजाच्या वरिश्ठां कडेन संबंद, लोकोत्सवांत व्हड व्हड फुडाऱ्यांक आमंत्रीक करप, श्रमधाम येवजणे वरवीं गरिबांक घरां बांदून दिवप, निवासी शाळा चलोवप, हीं रमेश तवडकार हांची बेरजेचीं गणितां. तातूंत जिद्द आनी चिकाटीन खंयच्याय कामांत लक्ष घातलें जाल्यार तें पुराय करूनच मेकळें जावप, ही तांची चिकाटी. हेच खातीर भाजपाचे वरिश्ठ फुडारी व्ही. सतीश सयत हेर व्हड फुडारी तांचेर खूश आसात. रमेश तवडकार गोंयांतल्या आदिवासी समाजाचे फुडारी आशिल्ल्यान आदिवासी केंद्रीय समितीचें सचीवपद तांकां फावो जालां. कांय म्हयन्यांत कर्नाटकांत विधानसभा वेंचणूक जाल्यार 2024त देशांत लोकसभा वेंचणूक जावपाची आसा. आदिवासी चेरो आशिल्ले सभापती रमेश तवडकार हांकां व्हड पद दिवन कर्नाटकांतल्या आदिवसी समाजा मुखार प्रचारा खातीर धाडपाची शक्यताय आसा. ते फाटभुंयेर आमच्या काणकोण प्रतिनिधीन तांचे कडेन केल्ली ही चर्चा.

प्र. फुडले वेंचणुकेचो विचार करून तुमकां व्हड पद दिवपाचो विचार चल्ला अशी चर्चा आसा.

  • आपूण एक सामान्य कार्यकर्तो. आपूण खंयचेच राजकी सर्तींत ना. राजकी सर्तींत देंवपाक आपल्या आवडना. सध्याच्या पदाचेरूच आपूण खूश आसा. आपूण आयोजीत करता त्या लोकोत्सवांत आदिवासी समुदायाक व्हड प्रमाणांत आस्पावीत करून हो महोत्सव येसस्वी करून दाखयला. ह्या कामांत येसस्वी थारिल्ल्यानूच भाजपाच्या वरिश्ठ फुडाऱ्यांनी आपल्या कामाची मेकळेपणान तुस्त तोखणय केल्या.

प्र. ‘श्रमधाम’ येवजणेक लोकांचो कसो तेंको मेळटा?

  • हे आदीं कमलाकर गांवकार हांचें घर फक्त 33 दिसांनी बांदून दिल्ल्याचें लोकांनी पळयलां. आतां 14 घरां बांदपाचो संकल्प केला. त्या 14 व्यक्तींची परिस्थिती लोकांक खबर आसा आनी सोशल मिडियाचेरूय ते विशीं व्हायरल जालां. त्या कुटुंबांक खऱ्यांनीच मजत करपाची इत्सा आशिल्ल्यांनी रक्कम दिल्या. तीं घरां बांदपाक दानी व्यक्तींचो व्हड प्रतिसाद मेळ्ळा. आपले आस्पती प्रमाण मजत करपाक फुडें सरिल्ल्या लोकां वांगडाच वेपारी वर्ग, सरकारी कर्मचारी, खाजगी कर्मचारी, शिक्षक, कोंकण रेल्वेचे अधिकारी हांणी अर्थीक मजत केल्या. घरां बांदपा खातीर जमीनदाराची परवानगी मेळानाशिल्ली. तांचे वांगडा बसून ताचेर उपाय काडला. हीं 14 घरां बांदून जाले उपरांत आनीक 85 घरां बांदपाचो विचार आसा. बसराम शिक्षण संस्थेच्या शिक्षकांनी आपल्या एका दिसाचें वेतन ह्या गरीब कुटुंबांचें घर उबें रावचें म्हूण दिलां. हे आदीं मिरजचे अंबाबाई शिक्षण संस्थेच्या शिक्षकांनी तशेंच थंयच्या आपल्या वर्गमित्रांनी तीन घरां बांदपा खातीर अर्थीक मजत दिवपाची तयारी दाखयल्या. फुडल्या दोन म्हयन्यांत हीं घरां बांदून पुराय करपाचो विचार आसा. तातूंत पालिका वाठारांत 6 घरां बांदतले. एका घराक सुमार 8 ते 10 लाख रुपया खर्च येतलो. कांय जाणांनी रेंवेचो जाल्यार कांय जाणांनी चिऱ्यांचो खर्च दिला. तुमी फुडें सरात अशें दानी व्यक्तींनी सांगिल्ल्यानूच हो जगन्नाथाचो रथ ओडपाची शक्त आपल्यांत आयल्या. हेरशी ह्या लोकांचें दुख्ख पळोवपाक जायनाशिल्लें. जेन्ना आपूण वेंचणुके वेळार मतदारां कडेन मतां मागपाक गेल्लों तेन्ना तांची ही परिस्थिती पळोवन खूब दुख्ख जातालें. तेन्नाच आपणें थारायिल्लें, वेंचणुकेंत जिखूं वा हारूं, ह्या गरिबांक तांचो हक्काचो आलाशिरो दिवपाचो यत्न करतलोंच. ताका आतां लोकांचे अर्थीक मजतीची जोड मेळटा. ही खोशयेची गजाल. हीं घरां बांदून दिवचे खातीर बलराम चॅरिटेबल फावंडेशनाची स्थापणूक केल्या. ह्या फावंडेशनाच्या नांवाचेर रोखडेंच खातें उक्तें करतले. ताका लागून दानी व्यक्तीक दान करपाक सोंपे जातलें.

प्र. 100 घरां बांदून पुराय जाले उपरांत दुसरो खंचो विशय हातांत घेतले?

  • हीं 100 घरां बांदून पुराय जाले उपरांत काणकोणकारांची भलायकी सांबाळपाचे नदरेन, भलायकी शिबिरां घेतले. मार्गदर्शकां कडल्यान दुयेंतींक योग्य मार्गदर्शन दितले. हे करनाच संस्कृती संवर्धन आनी शिक्षणाचेर भर दितले. बलराम चॅरिटेबल फावंडेशन हे मुखार चार विशय घेवन मुखार वतलें.

प्र. अशीर आनी धोकादायक करमल घांटांतल्या रस्त्या संबंदांत कसलीं उपाय येवजण हातांत घेतल्या? हालींच केंद्रीय येरादारी मंत्री नितीन गडकरी हांच्या ओएसडीन ह्या रस्त्याची पळोवणी केल्या. तशेंच आपणे पत्रवेव्हार चालू दवरिल्लो. करमल घांट ते गुळे मेरेनच्या रस्त्याचे दुरुस्ती खातीर साडेपांच कोटी रुपया मंजूर जाल्यात. एप्रील ते मे म्हयन्यांत करमल घांट्या वयलीं धोकादायक वोल्तां कांपपाचें काम सुरू जातलें.