भांगरभूंय | प्रतिनिधी
आयच्या डिजिटल आनी वेगान चलपी काळांत वेदनाशामक वखदां (पेनकिलर्स) आमच्या जिणे पद्दतीचो एक भाग जाल्यात. संगणका मुखार वरां वरां बसून काम केल्ल्यान तकली दुखप, धोपरा दुखप, कंबर दुखप, मासिक पाळीचो त्रास आसूं वा आंग दुखप आसूं हाचेर जायते जाण दोतोराचो सल्लो घेनासतना पेनकिलर्स घेतात. तात्पुरती आनी केन्ना केन्ना वापरपाक हीं वखदां प्रभावी आसलीं तरी वैजकी मार्गदर्शना बगर दर दिसा पेनकिलर्स घेतल्यार कुडीचे भितरल्यान लुकसाण जावंक शकता.
तकली दुखप, कुड दुखप वा हेर दुखणे हाचेर जायते जाण दोतोराचो सल्लो घेनासतना पेनकिलर्स वखदां घेतात. पूण दर दिसा पेनकिलर्स घेवप धोक्याचें थारूंक शकता. NSAIDs सारकिल्या वखदांक लागून पोटांत अल्सर, अॅसिडिटी, भितरल्यान रगत येवप आनी मूत्रपिंड अपेशी जावपाचो धोको वाडटा. तशेंच उच्च रक्तदाब आनी काळजाचो आताक येवपाचीय शक्यताय वाडटा. पॅरासिटामोल चड प्रमाणांत घेतल्यार यकृताक लुकसाण जावं येता. सतत वेदनाशामक वखदां घेवचे परस ताचें मुळावें कारण सोदून काडप आनी दोतोराचो सल्लो घेवप खूब गरजेचें.
नेमान वा दर दिसा वेदनाशामक वखदां घेतल्यार काळाप्रमाण कुडींतल्या जायत्या म्हत्वाच्या अवयवांक व्हड लुकसाण जावंक शकता. वखदांचो प्रकार, कितले प्रमाण घेतात आनी पिराय हांचेर धोको आदारून आसता. सगळ्यांत चड वापरांत आशिल्ल्या वखदां भितर NSAIDs (Non-Steroidal Anti-Inflammatory Drugs) म्हळ्यार आयबुप्रोफेन (Ibuprofen), डायक्लोफेनॅक (Diclofenac) आनी नॅप्रॉक्सेन (Naproxen) हांचो आस्पाव जाता.
हांचो चड वापर केल्यार हें धोके निर्माण जातात –
पोटाचे विकारः पोटांत जळजळ जावप, अॅसिडिटी, अल्सर (पोटांत जखम जावप) आनी भितरल्यान रगत (Internal Bleeding) येवपाचो धोको वाडटा.
मूत्रपिंडाचे लुकसाण: जाण्ट्या दुयेंतींक वा गोडेंमूत आनी उच्च रक्तदाब जाल्ल्या मनशांनी सदां वेदनाशामक वखदां घेतल्यार मूत्रपिंड निकामी जावंक शकता.
काळजाचो दुयेंस आनी रगतदाबः रगतदाब वाडप आनी काळजाचो आताक येवपाचो धोको वाडटा.
वेदनाशामक वखदां घेतना चॉकलेट सारकें सहज गिळप टाळचें. वखद घेतना सकयल दिल्ल्या गजालींचें खरपणान पालन करचें:
डोस मर्यादा पाळची: दोतोरान सांगिल्ल्या डोसा परस चड केन्नाच घेवचें न्हय.
रिकाम्या पोटार वखदां घेवप टाळचें: रिकाम्या पोटार केन्नाच वखदां, गुळयो घेवच्यो न्हय. कारण हाका लागून पोटाच्या अस्तराक लुकसाण जावंक शकता.
दुयेसांची म्हायती दिवची: तुमकां पयलींच अॅसिडिटी, अल्सर, मूत्रपिंड वा यकृताचे दुयेंस, उच्च रक्तदाब वा काळजाची समस्या आसल्यार दोतोराक स्पश्ट कल्पना दिवची.
वखदां मिक्स करप टाळचें: दोतोराच्या सल्ल्या बगर दोन ते तीन वेगवेगळ्या प्रकारचीं वेदनाशामक वखदां एकठांय घेवचीं न्हय आनी ह्या वखदां वांगडा सोरो पियेवप अत्यंत धोक्याचें थारूंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
