भांगरभूंय | प्रतिनिधी
मोहर्रम हो इस्लामिक कॅलेंडराचो पयलो म्हयनो. अख्ख्या जगभरांतले मुसलमान लोक ह्या म्हयन्याक विशेश म्हत्व दितात. मोहर्रम म्हणल्यार फकत नव्या वर्साची सुरवात न्हय, तर तो सत्य, न्याय, धीर आनी बलिदानाच्या यादींचो एक पवित्र काळ. इतिहासांत न्याया खातीर दिल्ल्या बलिदानाचें हें एक व्हड उदाहरण.
680 वर्सा इराकांतल्या करबला ह्या जाग्यार पैगंबर मुहम्मद (देवान तांचेर कृपा दवरूं) हांचे नातू इमाम हुसेन हे अन्याय आनी अत्याचाराच्या विरोधांत उबे रावले. तांणी सत्याची बाजू घेतली आनी अन्यायकारक धोरणाक मान्यताय दिवपाक न्हयकार दिलो. हाका लागून इमाम हुसेन, तांचें कुटुंब आनी तांचे वांगडी हांकां आडायलें. तांचेर खूब अत्याचार केले. तांकां पिवांक उदक आनी जेवण मेळनासलें. इतले अत्याचार सोंसून लेगीत इमाम हुसेन आनी तांचे वांगडी सत्याच्या मार्गाचेर ठाम रावले. मोहर्रमाच्या धाव्या दिसा, जाका ‘अशूरा’ म्हण्टात, ते शहिद जाले. इमाम हुसेन आनी तांच्या वांगड्यांनी दिल्लें तें बलिदान आयजूय जगभरांत न्याय, सत्य आनी मानवतेचें प्रतीक मानतात.
दरवर्सा मोहर्रमाच्या म्हयन्यांत मुसलमान लोक इमाम हुसेन आनी तांच्या वांगड्यांची याद करतात. देवा कडेन प्रार्थना करतात, कुरआन वाचतात आनी करबलाच्या घडणुके विशीं जागृती करपा खातीर कार्यावळी आयोजित करतात. अनेक जाग्यार गरिबांक अन्न आनी कपडे वांटून तांची मदत करतात. ह्या निमतान समाजात सेवा करपाची आनी भावपणाची भावना निर्माण जाता.
मोहर्रमाचो संदेश फकत एका धर्मा पुरतो मर्यादित ना, तर तो सगळ्यां खातीर आसा. हो संदेश सत्या खातीर उबे रावपाक, अन्यायाचो विरोध करपाक आनी कसलेंय संकश्ट आयलें तरी न्यायाचो मार्ग न सोडपाक सांगता. आयच्या काळांत, जेन्ना समाज अनेक अडचणींक सामकार वता, तेन्ना इमाम हुसेन हांच्या जीवनांतलें धीर आनी त्याग लोकांक प्रेरणा दितात. तांच्या संदेशांत शांतता, सहनशक्ती, मानवता आनी न्याय भरिल्लो आसा.
मोहर्रम हो फकत शोक व्यक्त करपाचो म्हयनो न्हय, तर इमाम हुसेन हांच्या जीवनांतल्यान प्रेरणा घेवपाचो एक म्हत्वाचो म्हयनो. करबलाच्या बलिदानाची याद आमकां आनी फुडल्या पिळग्यांक सदांच सत्य, न्याय आनी मानवतेच्या मार्गार चलपाची प्रेरणा दितली आनी मार्गदर्शन करतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
