सत्तरी म्हालांतल्या नागरिकांनी भलायकी सुविधांचो फायदो घेवचो

अडवय सत्तरी हांगा 108 सेवेचो शुभारंभ करतना आमदार डॉ. देविया राणे. वांगडा सरपंच उदयसिंग राणे, रूपचंद नावेलकार, पंचायतीचे पंच वांगडी, बाबूराव गावडे, रंजना राणे, विद्देश नायक, मनिषा पिळयेंकार, रूपाली गांवकार आनी हेर.

भांगरभूंय | प्रतिनिधी

डॉ. देविया राणे: ठाणे, अडवई ग्रामीण भलायकी केंद्रा खातीर 108 सुविधांचो शुभारंभ\

वाळपय: भलायकेच्यो सुविधायो सत्तरी म्हालांत दरेका गांवगिर्‍या वाठारा मेरेन पावल्यात. ह्या सुविधांचो दरेका नागरिकान फायदो घेवचो. 108 सुविधा ही सत्तरी म्हालाच्या खूबश्या वाठारांनी पावल्या. ताका लागून आतां येवपी काळांत फुडल्या उपचारां खातीर कसलेच तरेच्यो समस्या जाणवच्यो ना. हे सुविधायेचो दरेकल्यान फायदो घेवचो असो उलो पर्यें मतदार संघाची आमदार डॉ. देविया राणे हांणी दिलो.
पर्यें मतदार संघांतलें ठाणे गांवगिरें भलायकी केंद्र आनी अडवय गांवगिरें भलायकी केंद्रा खातीर 108 सुविधायेचो शुभारंभ केल्या उपरांत आमदार डॉ. राणे उलयताली. तिणें फित कापूण आनी पुजा करून ह्या सुविधायांचो शुभारंभ केलो.

भलायकेच्यो सुविधायो आतां सुरळीत जाल्यात. ताका लागून कसलीच चिंता करपाची गरज ना. पर्यें मतदारसंघांत खुबश्या सुवातांचेर गांवगिर्‍या भलायकी केंद्रा वरवीं भलायकेची सुविधा दारा मेरेन आयल्या. भलायकी मंत्री विश्वजीत राणे हांणी सत्तरी म्हालांत भलायकेच्यो सुविधायो सुरळीत उपलब्ध जावचे खातीर विवीध सुवातांचेर निर्माण करपाक भर दिल्या. ठाणे वाठारांत 108 सुविधा उपलब्ध जावची अशी जायत्या वर्सांची मागणी आशिल्ली. ती आयज पुराय जाता अशें म्हणीत डॉ. देविया राणे हांणी तांचे उपकार मानले.
ह्या वेळार पंचायतीची सरपंच सरिता गांवकार, पंचायतीचे पंच वांगडी सुभाष गावडे, विनायक गांवस, निलेश परवार, तनया गांवकार, सुरेश आयकार आनी हेर हाजीर आशिल्ले.

सरपंच सरिता गांवकार हांणी ठाणे गांवा खातीर 108 सुविधा उपलब्ध जाल्ले खातीर नागरिकां मुखार आशिल्ल्यो आडखळी आतां पयस जाल्यात, अशें तिणें सांगलें.

वाळपय रुग्णालयाचे भलायकी अधिकारी डॉ. रूपचंद्र नावेलकार हांणी ह्या वेळार आपले विचार मांडले.
अडवय गांवगिरें भलायकी केंद्रांत 108 सुविधायेचे शुभारंभ कार्यावळीक अडवय पंचायतीची पंच वांगडी रूपाली गांवकार, रंजना राणे, बाबुराव गावडे, किरण गावडे, विदेश नायक, मनीषा पिळयेंकार आनी हेर हाजीर आशिल्ले.