भांगरभूंय | प्रतिनिधी
भांगरभूंय । प्रतिनिधी
वाळपयः वाळपयच्या हनुमान विद्यालयान आयोजीत केल्ल्या सत्तरी तालुको पांवड्या वयले बॅडमिंटन सर्तींत केरीच्या स्वामी विवेकानंद विद्या मंदीर पंगड वस्ताद थारलो. ह्या पंगडांत सरिता नायक, संदेश नायक, आनी रामदास शेटकार हांचो आसपाव आशिल्लो. हे सर्तींत पर्यें भूमिका हायस्कूल, वाळपयचें अवर लेडी ऑफ हायर सेकंडरी, अडवय सरकारी उच्च माध्यमीक विद्यालय, वाळपय सरकारी माध्यमीक विद्यालय, हेडगेवार माध्यमीक विद्यालय आनी वाळपय हनुमान विद्यालय हांच्या पंगडांनी वाटो घेतिल्लो .
सर्तीचें उक्तावण हनुमान शिक्षण संस्थेचे अध्यक्ष आनी आदले उपसभापती नरहरी हळदणकार हांचे हस्तुकीं जालें. खेळ दरेकल्याच्या जिवितांतलो म्हत्वाचो घटक आसा. खेळाचेर लक्ष दिल्यार भलायकेचो सांबाळ करपााक जाता अशें तांणी सांगले. आमच्या विद्यालयान सत्तरी तालुक्यातल्या हेर विद्यालयाच्या पालवान वेगवेगळ्या तरेच्या खेळांचें आयोजन हांचें पयलीं केल्लें अशी म्हायती मुख्याध्यापिका सुविद्या बर्वे हांणी दिली. सर्तीच्या निमणे मानेस्तांचे हस्तुकीं जैतिवंतांक इनामां भेटयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.