भांगरभूंय | प्रतिनिधी
वाळपय, प्रतिनिधी: परत परत वचपी लायटी खातीर सत्तरी म्हालांतल्या खुबश्या वाठारांनी जमनी पोंदच्यान सरयो घातल्यात. ताका लागून खुबश्या रस्त्यां कुशीकची परिस्थिती इबाडल्या. ताका लागून हांगा पावसांत व्हडा प्रमाणांत अपघात जावपाची शक्यताय न्हयकारूं येना. ताका लागून वीज खातें आनी भौशीक बांदकाम खात्यान धोको निर्माण करपी रस्त्यांचेर बेगीन उपाय करचे अशी मागणी वाहन चालक आनी नागरीक करतात.
हे विशीं चड म्हायती प्रमाण, सत्तरी म्हालांत परत परत लायट वचपाचे त्रास सतायत आसता. हाका लागून वीज खात्या वतीन खुबश्या सुवातांचेर जमनी पोंदच्यान लायटीच्यो सरयो घालपाचें काम सुरू आसा. ह्यो सरयो रस्त्या कुशीक खळयो मारून घालतात. मात हें काम पुराय जालें तरी आजूनय हांगा फोडिल्लो रस्तो सारको करूंक ना. तशेंच हांगा पडिल्लीं फोंडकुलां पुरोवंक नात. खासा करून वाळपय नगरपालिका वाठारांत खुबश्या रस्त्यांचेर धोको निर्माण जाला. ताका लागून पावसांत व्हड अपघात घडपाची शक्यताय आसा.
सध्या हांगच्या खुबश्या फोंडकुलांनी फातर घालून तीं पुरोवपाचे यत्न केल्यात. मात रातच्या वेळार वाहन चालकाक रस्त्याचो अदमास येनासतना हांगा अपघात जावपाची शक्यताय न्हयकारू येना. ताका लागून भौशीक बांदकाम खातें आनी वीज खात्यान ह्या प्रस्नाचेर लक्ष दिवन धोको निर्माण करपी रस्त्यांचेर कितेंय उपाय काडचे अशी मागणी थळावे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
