भांगरभूंय | प्रतिनिधी
वाळपय, प्रतिनिधी: सोमार ८ एप्रिलाक भिंरोडा पंचायत वाठारांतल्या अनसोळे हांगा व्हड स्फोट जालो. हातूंत खुबश्या घरांक लुकसाण जालें. लुकसाणेचें सर्वेक्षण आजूनय सुरू आसा. हो स्फोट जिलेटिनाक लागूनच जाला अशी म्हायती सध्या राष्ट्रीय सुरक्षा दळ बॉम्ब निकामी पंगडान दिल्या. इतल्या व्हडा प्रमाणांत जिलेटीन सांठोवन दवरप गुन्यांव. हाका लागून दुबावीत नासीर हुसेन जमादार हांचेर अटक करपाची कारवाय केल्या. हाचें मूळ सत्तरी म्हालांत व्हडा प्रमाणांत सुरू आशिल्ल्या बेकायदेशीर चिरेखाणीचें आशिल्ल्याचें स्पश्ट जालां. चिरेखाणीच्या वेवसाया खातीर व्हडा प्रमाणांत जिलेटीनाचे स्फोट घडोवन हाडटात. हांगच्या सगळ्यो चिरेखणी बेकायदेशीर आसात. नागरीक हे विशीं सेगीत आरोप करून लेगीत आयज मेरेन एकूय चिरेखाण कायमची बंद करपाचें धाडस सरकाराक जावंक ना. अनसोळें हांगा मातयेंत पुरून दवरिल्ले जिलेटीन हें चिरेखणी आनी फातर कागडपाक वापरता अशी म्हायती दुबावीत नासीर जमादार हांणी पुलिसांक दिल्या. हाका लागून आतां सरकार सत्तरी म्हालांतल्या चिरे खाणींच्या वेव्हाराचेर विशेश लक्ष दिवन खोलायेन चवकशी करपाचें धाडस करतलें काय ना? असो प्रस्न निर्माण जाला.
सत्तरी म्हालांतल्या सगळ्याच पंचायत वाठारांनी बेकायदेशीर चिरेखणींचो वेवसाय सुरू आसा. हांगा सुमार शंभरां परस चड चिरेखणी सुरू आसात. तांचेर छापे घाल्यात. मात आजूनय एकूय चिरेखण बंद जावंक ना. खुबशे कडेन घटमूट फांतर आशिल्ल्यान थंय मशिनां वरवीं चिरे काडप शक्य ना. ताका लागून जिलेटीन वापरतात. घट फातर फोडले उपरांत मशिना वरवीं चिरे काडटात. खासा करून दनपरां वा रातचें उसरां जिलेटिनाचे स्फोट करतात. हाचे वरवीं भोंवतणच्या सैमाचें आनी घरांचें लुकसाण जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
