भांगरभूंय | प्रतिनिधी
अन्सोळें जिलेटीन स्फोटाचो परिणाम; पुलिसां वतीन चिऱ्यां खणींचेर झडटी
भांगरभूंय । प्रतिनिधी
वाळपयः अन्सोळें सत्तरींत 8 एप्रीलाक जिलेटीनाचो व्हड स्फोट जाल्लो. ते उपरांत सत्तरी म्हालांतल्यो सगळ्यो बेकायदो चिऱ्या खणी सध्या तरी बंद आसात. थळाव्या पुलिसांनी साबार चिऱ्यां खणींचेर झडटी चालू आसा.
जिलेटीन स्फोट प्रकरणांत अटक केल्लो दुबावीत आरोपी नासीर हुसेन जमादार हाचे कडल्यान वेगवेगळ्या पांवड्याचेर म्हायती घेवपाचो यत्न पुलीस करतात. जांचे कडल्यान हो जिलेटीनाचो सांठो हाडिल्लो ताचीय खोलायेन चवकशी चल्ल्या. ह्या संबंदांत खूबशीं नांवां उजवाडाक आयल्यात. तांकां बेगिनूच जबानी खातीर आपयतले, अशें पुलिसांनी स्पश्ट केलां.
मेळिल्ले म्हायती प्रमाण पुलिसांनी खूबश्या चिऱ्या खणींचेर धाड घातिल्ल्यान हो ववसाय पुराय तरेन बंद जाला. चिऱ्यां खणींच्या वेवसाया खातीर जिलेटीनाचो वापर करतात. जंय चिरे काडटात थंय वयल्या भागाचेर घट फातर आसता. तो फातर चिऱें काडपाच्या मशिना वरवीं फोडप अशक्य आसता. ते खातीर तो फोडपाक जिलेटीनाचो वापर करतात. असो वापर खूबश्या चिऱ्यां खणींचेर जाता. हो वापर पुराय बेकायदो आसा. जिलेटीनाचो वापर करचे खातीर रितसर परवानगी घेवप गरजेचें आसता. तशेंच जिलेटीनाचो वापर करतना ते खातीर तज्ञ लोकांची मजत घेवप गरजेची आसता. मात सत्तरी म्हालांतल्या बेकायदो चिऱ्या खणींचेर जिलेटीनाचो स्फोट करतना कसलेच तरेची खबरदारी घेनात, अशें मुखार आयलां. हेच खातीर लागसारच्या घरांक व्हड प्रमाणांत धोको उप्रासता. सध्या अन्सोळेंचे जिलेटीन स्फोट ताजें आसा. ताका लागून चिऱ्या खणींक थळावे लोक व्हड प्रमाणार विरोध करपाक शकतात. ही शक्यताय लक्षांत घेवन सध्या चिऱ्यां खणींचो वेवसाय बंद आसा, अशी म्हायती मेळ्ळ्या.
जिलेटीनाचो संबंद थेट सावंतवाडी कडेन?
अन्सोळें जिलेटीन स्फोटा संबंदांतलो तपास सध्या झुजा पांवड्यार चल्ला. जाचे कडल्यान हो जिलेटीनाचो सांठो हाडिल्लो तांकांय म्हायती खातीर आपयल्यात. जिलेटीनाचो सांठो विकत घेवचे खातीर सावंतवाडी मेरेन संबंद आशिल्ल्याचें मेळिल्ले म्हायती वयल्यान कळ्ळां. सावंतवाडींतल्यान संबंदितांक आपोवन तांच्यो जबान्यो घेतल्यात. तांचीय खोलायेन चवकशी चालू आसा, अशें पुलिसांनी स्पश्ट केलां. दुबावीत आरोपी नासीर हुसेन जमादार हो जिलेटीन हाडून तें चड मोलान विकतालो, अशीय म्हायती खूब जाणां कडल्यान मेळ्ळ्या. ते नदरेंतल्यान पुलीस तपास करतात, अशें कळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
