भांगरभूंय | प्रतिनिधी
वाळपय, प्रतिनिधी ः सत्तरींतल्या गुळेली, खोतोडें, ठाणे आनी भिरोंडेंच्या उपसरपंचांनी आपल्या पदाचो राजिनामो दिलो. हाका लागून उल्लेख केल्ल्या पंचायतींच्या उपसरपंचाची वेंचणूक जातली.
डोंगुर्ले – ठाणेची तनाया तुळशीदास गांवकार, खोतोडें पंचायतीची नंदिनी म्हाळशेकार, भिरोंडें पंचायतीची मनीषा पिळयेकार, गुळेली पंचायतीची अक्षिता गावडे हांणी अलिखीत करारा प्रमाण उपसरपंच पदाचो राजिनामो दिला.
सत्तरी म्हालांतल्या वट्ट बारा सरपंच आनी उपसरपंच बदलपाची प्रक्रिया सुरू जाल्या. आतां मेरेन जायते नवे सरपंच वेंचून काडल्यात. जाल्यार आतां वट्ट बारा मदल्या चार ग्रामपंचायतीच्या उपसरपंचांनी राजिनामो सादर केला. हांतूत गुळेली, खोतोडें ठाणे आनी भिरोंडें ग्रामपंचायतींचो आस्पाव आसा.
सत्तरी गट उदरगत कार्यालयांतल्यान मेळिल्ले म्हायती प्रमाण वयल्या चार उपसरपंच पदांचो राजिनामो दिल्ल्याची म्हायती गट उदरगत अधिकारी राणे हांणी दिल्या. हे विशीं उलयतना तांणी सांगलें, उपसरपंच पदाचो राजिनामो गट उदरगत कार्यालयांत सादर केला. हाका लागून नवो उपसरपंच वेंचपाची प्रक्रिया बेगीन सुरू जातली अशें तांणी सांगलें.
मजगतीं, हाचे आदीं केरी, पर्ये, ठाणे, नगरगांव आनी म्हाऊस ह्या गांवां खातीर नवे सरपंच वेंचून काडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
