भांगरभूंय | प्रतिनिधी
पुरवण सुरळीत जालीना जाल्यार खर आंदोलनाची शिटकावणी
वाळपय, प्रतिनिधी ः सत्तरी तालुक्याच्या गांवगिऱ्या वाठारां कडेन वीज खातें पुरायपणान दुर्लक्ष करता. जायते फावटीं वीज पुरवण खंडीत जाता, पूण चार- चार दीस हाचे कडेन कोणूच लक्ष दिनात. देखून सावड्डें पंचायतीच्या करंझोळ- कुमठळ वाठारांतय अशीच परिस्थिती जाल्या. फाटल्या तीन दिसां सावन वाठारांतली वीज पुरवण खंडीत जाल्या. हांका लागून गांवांतले लोक बेजारल्यात.
हे संबंदी आयज पंचायत वांगडी यशोदा गांवकार हांच्या फुडारपणा खाला गांवच्या लोकांनी वाळपय वीज कार्यालयाचेर मोर्चो व्हरून हे संबंदी तिडक काडली. एके वटेन वाडत वचपी लायटीची बिलां आनी दुसरे वटेन खंडीत वीज पुरवणेक लागून गांवगिऱ्या वाठारांतल्या लोकांक खूब त्रास सोंसचे पडटात, अशें थळाव्यां लोकांनी सांगलें. अधिकाऱ्यां मुखार बरीच तिडक लोकांनी काडली. दोन दिसां भितर वीज पुरवण सुरू जावंक ना जाल्यार गंभीर परिणामांक तोंड दिवचें पडटलें अशी शिटकावणी तांणी दिल्या.
जायते फावट हे संबंदीं वाळपय अधिकाऱ्या कडेन संपर्क केलो आनी कागाळ केली. पूण ही कागाळ अजून घेवंक ना. फाटल्या एका वर्सा सावन ही समस्या निर्माण जाल्या. सध्या केबल घालपाचें काम चालू आसा. पूण ह्या वावराक अजून गती मेळूंक ना. ताचो त्रास लोकांक सोंसचो पडटा.
मजगतीं, हे संबंदी चड म्हायती दितना थळाव्यांनी सांगलें, आयज अधिकाऱ्यां कडेन हें विशीं उलोवप जालां. गांवांतल्या परिस्थितीची पुराय जाणविकाय तांकां आसा. हाका लागून दोन दिसां भितर पुरवण सुरळीत जाली ना जाल्यार वाळपयच्या कार्यालयांत आंदोलन करतले अशी शिटकावणी थळाव्यांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
