भांगरभूंय | प्रतिनिधी
आमच्या काळजा लागीं आशिल्ली आमची जिवनदायनी म्हादय न्हंय. आज तिचें आमकां सत्तरीच्या लोकांक कांयच पडिल्लें ना अशें दिसूंक लागलां. तशेंच आमी म्हादय न्हंयक वाचोवपाक कांयच हालचाल वा आवाज करिनात. तेन्ना अशें दिसून येता, आमी सगळे सत्तरीकार गुलामगिरींत जगता म्हूण. आमचो आवाज खंय तरी दामून उरला. आमी म्हादय वाचोवपाक आवाज करपाक भितात. आमकां म्हादय न्हंय कर्नाटकात गेल्यार चलता. पूण, आमी सत्तरीकार तिका वाटोवपाक रस्त्यार येवपा ना वा अजिबात तोंड उगडपा ना. आमकां गुलामगिरींत जगपाची संवय जाल्ली आसा. आमची ती संवय केन्नाच मोडपा ना. आमी फकत गुलामगिरींत जगतले. मरतले. पूण आमची म्हादय आवय हांगाच उरतली. मागीर ती सत्तरींत सुकून वचूं वा तिचें उदक कर्नाटकांत वचूं. ती मात हांगाच उरतली हें आमी लक्षांत दवरपाक जाय.
आमी सत्तरीकार म्हादय न्हंयेक वांचोवपाक कांयच करपा ना. तेन्ना तिका वाचोवपाक आमचे गोंय भरचे गोंयकार भाव- भयणी सत्तरीच्या वाठारांत येतात. तें बीन म्हादय न्हंय बाबतींत जन जागृताय करपाक एक पदयात्रा काडपाक येतात. आमी सगले सत्तरीकार न्हिदल्या म्हूण आमकां जागें करपाक ते येतात. तेन्ना आमी तांकां, ते भायले लोक म्हणप फावता काय? तांकां वायट वायट शब्द दिवप आमकां सोबता? अशें तांणी आमचें वायट केलें तरी कितें? ते फकत म्हादय न्हंय वाचोवपाक एक पदयात्रा काडपाक आयिल्ले. आनी आमी तांकां पदयात्रा काडपाक दिली ना. तांकां धांवडावन घाले. आनी आतां आमी स्वताक अशें समजता जशें काय आमी व्हडलें बरें काम केल्या भाशेन. जे लोक म्हादय न्हंय वाटोवपाक पदयात्रा काडपाक आयिल्ले तांकां धांवडावन आमी आयज तांकां दाखोवन दिलें आमी गुलामगिरींत जगतात म्हूण.
उत्तर गोंयच्या चडशा वाठारांतले लोक म्हादय न्हंयेचें उदक पितात. म्हणटकच म्हादय न्हंय सगळ्यां गोंयकारांच्या काळजांत व्हांवता. म्हादय न्हंयक जे लोक वाचोवपाक सत्तरींत येतले तांकां आमी आडोवपाक शकनात. सगळ्या गोंयकारांक सत्तरींत म्हादय आवयक वाचोवपाक येवपाक वा म्हादय न्हंयक वाटोवपाक पदयात्रा काडपाक हक्क आसा. तांकां आमी आडोवपाक शकनात. सत्तरी सोडली जाल्यार गोंयच्या हेर भागांतले लोक आमच्या सारके गुलामगिरींत जगनात. सत्तरी सोडली जाल्यार गोंयचे बाकीचे सगलें लोक भायले? आनी सत्तरी तालुको तितलो गोंय कितें? आज सत्तरींत रावपी सुमार 60 हजार लोक, हें सगळे 60 हजार लोक काय मूळ सत्तरीकार जावन आसा? सगळे जाण खंयच्यान ना खंयच्यान येवन सत्तरींत स्थायीक जाल्यात. सत्तरीचें दोनूय आमदार सत्तरींत रावता काय? मागीर ते भायले न्ही.
मनोज परब, ताचो इश्ट विरेश बोरकार आनी तांची आरजीची सेना जेन्ना सत्तरींत म्हादय न्हंयेक वाचोवपाक एक जागृत पदयात्रा काडपाक आयिल्लें तेन्ना आमी तांकां आडयलें, तांकां व्हडलीं व्हडलीं शापोतां सांगलीं आनी तांकां म्हणलें, ते सगळे भायले लोक म्हूण. एक सांगात, आरजी पक्षाचे सत्तरींत सुमार 10 हजार कार्यकर्ते आसात. वाळपय मतदार संघांत 7 हजार आनी पर्या मतदार संघांत 3 हजार. हे सगले 10 हजार सत्तरींतले लोक भायलें जाले?
तशेंच आरजीचो सांत आंद्रे मतदार संघाचो आमदार विरेश बोरकाराक सत्तरीच्या लोकांनी सत्तरी भायलो म्हूण वचपाक लायलो. एक सांगात, गोंय वैजकी म्हाविद्यालय खंय आसा? आमदार विरेश बोरकार हांच्या मतदार संघांत न्ही. आनी गोंय वैजकी म्हाविद्यालयांत कामाक खंयचे लोक आसात? चडशे सत्तरीचे न्ही? आमदार विरेश बोरकार आनी सांत आंद्रे मतदार संघांतल्या लोकांनी, सत्तरींतल्या लोकांक जे जीएमसींत कामाक वतात वा जीएमसींत उपचाराक वतात तांकां आडोवन भायले लोक म्हूण सांगून धांवडावपाक शकनात? आनी जर सत्तरीच्या लोकांक जे जीएमसींत कामाक वतात तांकां आडोवन भायले म्हूण
धांवडायले जाल्यार आमकां बरें दिसतलें न्ही? गोंयांत आमी जेन्ना गोंयकारांकूच भायले म्हणपाक लागलें, जाल्यार आनीक कितें उरलां.
आज सत्तरींतल्यो बारा पंचायती वाळपयच्या उपजिल्लोधिकाऱ्याक निवेदन दिता, आरजीचे म्हादय जन जागृती पदयात्रेक अनुमती दिवची न्ही म्हूण. कारण कायदो आनी सुवेवस्था इबाडटली. ताका लागून 12 पंचायतींचो आरजीचे पदयात्रेक खर विरोध आसा. ह्या 12 पंचायतीच्या सरपंचांनी सांगपाचें सत्तरींतल्या खंयच्या पंचायत वाठारांत 24 वरां नळांक उदक आसता वा 24 वरां नळाक उदक येता म्हूण. सत्तरींतल्यान म्हादय न्हंय व्हांवन लेगीत आज मेरेन सत्तरीच्या पंचायत वाठारांनी केन्नाच सारके 24 वरां नळाक उदक आयलें ना. म्हादय कर्नाटकांत घुंवडायली जाल्यार सत्तरीच्या पंचायत वाठारांनी नळाक मात सुदा उदक येवपा ना, हें आमचे तकलेंत येना.
गांवगिऱ्या वाठारांतले लोक सदांच बोवाळ घालीत आसता, उदक नळांक सारके येना म्हूण. उदकाची समस्या सोडयना म्हूण कांय भागांतले लोक पंच वांगड्याक आनी सरपंचाक बुरश्यो गाळयो लेगीत घालतात. सत्तरीच्या कांय भागांनी लोकांचे उदकाक लागून खूब हाल जातात. तेन्ना हे
बाबतींत वाळपयच्या उपजिल्लोधिकाऱ्याक कोणें तरी आयज मेरेन कित्याक निवेदन
दिलें ना? ह्या लोकांक सामान्य जनतेचें पडिल्लें ना.
पर्या पंचायत वाठारांत बायलांक घरांतलीं कामां सोडून, उदकाक लागून टँकराची वाट पळोवपाची पडटा. तशेंच भिरोंडा, डोंगुर्ली, सावर्ड्या पंचायत वाठारांनी लोकांक अशेंच उदकाच्या टँकराची वाट पळयत बसची पडटा. तेन्ना टँकरांनी उदक लोकांक दिवप केन्ना बंद जातलें काय. गोंय मुक्त जावन आतां 60 वर्सां पुराय जालीं. सत्तरी केन्ना टँकर मुक्त जातली काय?
आयज सत्तरींत लोक म्हादय वाटोवपाक पदयात्रा काडटा म्हूण आमी तांकां धांवडावन घालतात. फाल्यां जेन्ना म्हादय न्हंय सुकतली आनी आमी उदकाक लागून तळमळून मरतले तेन्ना, आमकां उदक दिवपाक धांवत कोण येवपा ना. हें आमी आज लक्षांत दवरपाक जाय. चिड्डून माड्डून उरिल्ल्या आनी गुलामगिरींत जगपी सत्तरींतल्या भुंयपुतांनो आतां तरी जागे जायात.
देवेंद्र गणेश गांवकार
7798106277
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
