भांगरभूंय | प्रतिनिधी
श्रीराज शेलारः मोरजे संवसार पाडव्या निमतान प्रभात फेरी
भांगरभूंय । प्रतिनिधी
पेडणें: 1 जानेवारीक इंग्लीश नवें वर्स मनयतना दर्यावाठारांत आयोजीत केल्ल्या पार्ट्यां वरवीं दर्याचें पावित्र्य नश्ट जाता. हें पावित्र्य पुनर्स्थापीत करचे खातीर दर्यादेगेर भारतीय संस्कृती प्रदर्शक कार्यावळींचें आयोजन जावप गरजेचें आसा, अशें श्री दत्त पद्मनाभ पिठाचे पेडणें विभाग मुखेली श्रीराज शेलार हांणी सांगलें. श्री दत्त पद्मनाङ पीठ पेडणें म्हाल समिती आनी हिंदू समिती हांच्या जोडपालवान मोरजी वाठारांत संवसार पाडव्या निमतान आयोजीत केल्ले प्रभात फेरीच्या समारोप सुवाळ्यांत ते उलयताले.
मोरजी दर्यादेगेर आयोजीत केल्ले हे कार्यावळीक माचयेर पेडणेचे उपजिल्होधिकारी दीपक वायंगणकार, पेडणें म्हाल श्री दत्त पद्मनाभ विठाचे उपाध्यक्ष गुरुदास पांडे, धर्म प्रचारक व्ही. जी. शेटगांवकार, ॲड. प्रसाद शहापूरकार, जिल्हो पंचायत वांगडी सतीश शेटगांवकार, मोरजीची सरपंच सुरेखा शेटगांवकार, उपसरपंच पवन मोर्जे, सुभाष पार्सेकार आनी हेर मानेस्त हाजीर आशिल्ले.
श्री पद्मनाभ पिठा वतीन हिंदी जनजागृती अभियान चलयतात. तातूंत दर्यादेग वाठारांत धर्मीक संस्कृतीक कार्यावळींचें आयोजन करतात. तातूंत मिरामार दर्यावेळार योग शिबीर, मोरजे शिवरात्र उत्सव, विवीध वाठारांनी आयोजीत करतात तीं संस्कार शिबिरां, हळडू कुकूम सुवाळो, भौशीक गणेश उत्सवांतले अथर्वशिर्श पठण अशा साबार कार्यावळींचो आस्पाव आसा. ज्या दर्यादेगांचेर गोंयचें अर्थकारण चलता, त्यो दर्यादेगो पाश्चात्य विकृतीच्या चपक्यांत सांपडल्यात. तातूंतल्यान भायर काडचे खातीर संस्कृती दर्शक कार्यावळींची गरज आसा, अशें शेलार हांणी सांगलें. दर्यादेग वाठारांत पातळपी ड्रग्ज, शिंदळकी वेवसाय आडावन तरणाट्यांक व्यसन मुक् करपाची गरज आस, अशेंय तांणी सांगलें.
उपजिल्होधिकारी दीपक वायंगणकार हांणी सांगलें, आमचें हिंदू नवें वर्स संवसार पाडव्याक सुरू जाता, ते संबंदांत खूबश्यो दंतकथा आसात. तातूंतली एक म्हणल्यार ब्रह्म देवान सृश्टीची निर्मिती केली तो दीस म्हणल्यार संवसार पाडवो. संवसार पाडव्याकूच रामान रावणाचो वध केलो आनी वनवास सोंपोवन अयोध्येंत एक नवो अध्याय सुरू केलो. आयज हो दीस दर्यादेगेर मनयतात ही समाधानाची गजाल. पाश्चात्य संस्कतीचें बुरशें प्रदर्शन करपी आनी विघातक गजालींनी भरिल्ल्यो ह्यो दर्यादेगो नितळ करपाची गरज आसा. तशेंच भारतीय संस्कृती प्रस्थापीत करपाची गरज आसा, अशें तांणी सांगलें. ह्या वेळार विवीध मळा वयल्या मानेस्तांचो उपजिल्होधिकाऱ्यां हस्तुकीं सत्कार जालो. व्ही. जी. शेटगांवकार हांणी सुत्रसंचालन केलें. ते आदीं मोरजी खींड ते दर्यादेग वाठारांत दुचाकी प्रभात फेरी काडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
