भांगरभूंय | प्रतिनिधी
आता 25 मे मेरेन येलो अॅलर्ट जारी
पणजी, प्रतिनिधी : दमट हवामाना सयत दर दिसा ह्या ना त्या वाठारांत पावसाच्यो दडको पडप सुरूच आसा. राज्याच्या सगळ्या वाठारांनी 1 इंचा परस चड आडवेळो पावस नोंद जाला. फोंड्यां वाठारांत सगळ्यांत चड 8.80 इंच (223.6 मिमी) आडवेळ्या पावसाची नोंद जाल्या. मजगती, बिरेस्तारा दीसभर दमट हवामान आशिल्लें. 25 मे मेरेन येलो अॅलर्ट जारी करतानाच 29 मे मेरेन पावस पडपाचो अदमास हवामान खात्यान उक्तायला.
दर्या खवदळिल्लो आसतलो. हाका लागून नुस्तेमारांनी नुस्तेमारी खातीर दर्यांत वच्चें न्हय, अशी शिटकावणी हवामान खात्यान जारी केल्या. 1 मार्च उपरांत जो पावस पडटा, ताची गणती आडवेळ्या पावसांत जाता. राज्यांत आतां मेरेन सरासरी 96.2 मिमी आडवेळो पावस (1 मार्च उपरांत) पडला. हे प्रमाण सरासरी परस 153.6 टक्के चड आसा. फोंण्यां सगळ्यांत चड जाल्यार म्हापसा सगळ्यांत उण्या 31.7 मिमी पावसाची नोंद जाल्या.
मॉन्सून 31 मे मेरेन केरळांत पावतलो, असो हवामान खात्याचो अदमास आसा. मॉन्सून पावपाक थोडो उशीर आसलो तरी आडवेळ्या पावसाक लागून उकाड्या सावन थाकाय मेळटा. दर दिसा पावसाच्यो दडको पडटात. फांटले 24 वरांत (बुधवारा) पेडण्या 15.2 मिमी पावसाची नोंद जाल्या. फोंडें, पणजे, पोरणें गोंय हांगा आडवेळ्या पावसाचे प्रमाण चड आसा जाल्यार म्हापसा, पेडण्या ते उणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
