भांगरभूंय | प्रतिनिधी
पणजीः देशभरांतल्या केंद्रीय कर्मचार्यांचें आनी निवृत्तीवेतनधारकांचें लक्ष सध्या आठव्या वेतन आयोगाच्या बसकांचेर आसा. केंद्र सरकाराच्या कर्मचार्यांच्या पगारांत दर धा वर्सांनी एक फावट सुदारणा करतात. ते प्रमाण नव्या पगार आयोगाची थापणूक जाले उपरांत आतां प्रत्यक्ष कामाक गती मेळ्ळ्या, आनी देशभरांतल्या वेगवेगळ्या कर्मचार्यांच्या संघटनां कडल्यान सुचोवण्यो आनी मागणी मागयलो वतात. हे पुराय प्रक्रियेंत कर्मचार्यां खातीर सगळ्यांत म्हत्वाचो घटक म्हळ्यार ‘फिटमेंट फॅक्टर’ (पगार वाडोवपाचें सूत्र) आनी ह्या सुत्राच्या आदाराचेर नवी पगार गणना सादर करतले. ६ व्या आनी ७ व्या वेतन आयोगाच्या काळांत होच फॅक्टर कर्मचार्यांचो पगार वाडपाचो मुखेल आदार आनी आनी मूळ पगार, म्हारगाय भत्तो आनी हेर भत्तो हांची पुनर्रचना करप शक्य जाल्लें.
आदल्या ७ व्या वेतन आयोगाचो इतिहास पळयल्यार तो २८ फेब्रुवारी २०१४ दिसा स्थापन जाल्लो, ताचे उपरांत आयोगाक निमाणी शिफारशी सादर करपाक वट्ट २१ म्हयने लागले आनी अहवाल १९ नोव्हेंबर २०१५ दिसा सादर केलो. सद्याची परिस्थिती मतींत घेतल्यार ८ व्या पगार आयोगाची स्थापणूक ३ नोव्हेंबर २०२५ दिसा जाल्या. नेमा प्रमाण ह्या आयोगाक आपलो सविस्तर अहवाल सादर करपाक १८ म्हयन्यांची मुजत दिल्या.
वेगवेगळ्या स्त्रोतां कडल्यान मेळिल्ले म्हायती प्रमाण, सगल्या संबंदीत पक्षां कडेन सविस्तर चर्चा करून आयोग निमाणो अहवाल २५ जुलय २०२७ मेरेन सरकाराक सादर करूंक शकता. ह्या अहवालाक निमाणी मान्यताय केंद्रीय मंत्रीमंडळ आनी सरकार दितलें.
पगार वाडपाच्या ह्या पुराय गणनेंत ‘फिटमेंट फॅक्टर’ ही संकल्पना खूब म्हत्वाची. साद्या उतरांनी सांगपाचें जाल्यार पगार वाडोवपाचें हें एक गणनेचें सूत्र आसून ताचेर आदारून कर्मचार्यांचो नवो मुळावो पगार थारायतात. सद्याच्या मूळ पगाराक ह्या थारावीक सुत्रान म्हळ्यार फिटमेंट फॅक्टरान गुणाकार करतात आनी नवो मूळ पगार उक्तो जाता. सातव्या वेतन आयोगाची अंमलबजावणी करतना हो घटक २.५७ अशें थारायल्लें. ह्या सुत्राक लागून केंद्रीय कर्मचार्यांचो उण्यांत उणो मूळ पगार सरळ ७ हजार रुपया वयल्यान १८ हजार रुपया मेरेन वाडयलो. आदल्या काळांत अशें प्रत्यक्ष सूत्र वापरनाशिल्ले, पूण बाजारांतल्या चलनवाडीचो आनी हेर अर्थीक घटकांचो अभ्यास करून पगाराची सुदारणा वेगवेगळ्या तरांनी करताले.
येवपी आठव्या पगार आयोगा खातीर सरकारान वा आयोगान अजून अधिकृत फिटमेंट फॅक्टर जाहीर करूंक ना. पूण अर्थीक विश्लेशक आनी वेगवेगळ्या अहवालां प्रमाण हो घटक अंदूं २.२८ ते ३.८३ मदीं थारावपाची शक्यताय आसा. ह्या सुत्राक निमाणी मान्यताय मेळ्ळी जाल्यार कर्मचार्यांच्या पगारांत बरीच वाड जातली. ह्या येवपी निर्णयाचो थेट फायदो आनी अर्थीक परिणाम देशांतल्या सुमार १.१ कोटी केंद्रीय कर्मचार्यांचेर आनी निवृत्ती वेतनधारकांचेर जातलो. देखून बाजारांतली वाडटी चलनवाड आनी अर्थीक स्थिरताय मतींत घेतल्यार ह्या आयोगाच्यो शिफारशी खूब म्हत्वाच्यो आनी संवेदनशील मानतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
