भांगरभूंय | प्रतिनिधी
चेन्नय : ‘फ्युचर गेमिंग अँड हॉटेल सर्विसेस’ च्या सांतिआगो मार्टीनाची काणीं व्यक्तीचीं सपनां आनी राजकी घोटाळ्यांची भरसण दाखोवपी आसा. मार्टीन म्यानमारांत मानाय म्हणून काम करतालो. १९८८ वर्सा थंयच्यान परत येतकच ताणें कोयंबतुरांत ‘मार्टिन लॉटरी एजन्सीज लिमिटेड’ स्थापन करून लॉटरी वेवसाय सुरू केलो. ताणें लॉटरींतल्यान सामान्य मनशाक सपनां विकपाक सुरवात केली आनी भारताचो सगळ्यांत व्हडलो लॉटरी वेवसायीक जावपाक वयर सरलो. हें करतना ताणें राजकी संबंद फुलयले, तांचो वापरूय केलो.
‘लॉटरी किंग’ मार्टीन कितलींशींच वर्सां अंमलबजावणी संचालनालयाच्या (ईडी) रडाराचेर आशिल्लो. ताच्या ‘फ्युचर गेम्स अँड हॉटेल सर्विसेस’ कंपनीन एप्रिल 2019 ते जानेवारी 2024 मेरेन सगळ्यांत चड 1,368 कोटी रुपयांची वेंचणूक रोखे (इलेक्टोरल बॉण्ड) विकत घेतल्यात. ते कोणाक दिल्यात तें स्पश्ट जावंक ना. 2003 वर्सा तमिळनाडूंत लॉटरीचेर बंदी घाल्ली तरी जायत्या जाणांक ‘मार्टिन लॉटरी’ हें नांव अजूनय याद आसा.
मार्टीन कंपनीचे मालकेची फ्युचर गेमिंग सोल्युशन्स इंडिया प्रा. लिमिटेड ही सिक्किम लॉटरीची मुखेल वितरक आसा. केरळांत फटीची लॉटरी विकून सिक्किम सरकाराक 900 कोटी रुपयां परस चड लुकसाण जाल्ल्यान 2003 वर्सा ईडीन मार्टिनाची सुमार 457 कोटी रुपयांची मालमत्ता गोठयल्ली. केरळांत सिक्किम सरकाराची लॉटरी विकपा संबंदी मार्टीन आनी हेरां आड सीबीआयन केस नोंद केल्ली. उपरांत ईडीन अर्थीक गैरवापर आडावपाच्या कायद्या खाला कारवाय केली.
केंद्रीय गृह मंत्रालयान 23 सप्टेंबर 2019 दिसा मार्टीनाच्या उद्देगां संबंदी अस्तंत बंगाल, महाराष्ट्र आनी पंजाब, कर्नाटक, केरळ, सिक्किम, मेघालय आनी अरुणाचल प्रदेश राज्यांक पत्रां धाडिल्लीं. ह्या पत्राच्या 10 दिसां भितर ‘फ्युचर गेमींग अँड हॉटेल्स’ कंपनीन 190 कोटी रुपयांची वेंचणूक बाॅण्ड विकते घेतिल्ले. अस्तंत बंगाल सारक्या राज्यांनी लॉटरीचेर बंदी आसून लेगीत मार्टीन ‘बेकायदेशीर’ रितीन लॉटरी विकतालो. तशेंच केरळांत ताणें जायते बेकायदेशीर वावर केल्यात हें राज्याक कळ्ळे उपरांत गृह मंत्रालयान केरळांत लॉटरी करपाक बंदी घाली. केंद्रीय गृह मंत्रालयाच्या ह्या पत्रा उपरांत कंपनीन ऑक्टोबर 2019 वर्सा वेंचणुकेचे बॉण्ड विकतें घेवपाक सुरवात केली. त्या एका म्हयन्यांत कंपनीन 190 कोटी रुपयांचे बॉण्ड विकतें घेतले.
‘द इंडियन एक्सप्रेस’च्या आदल्या अहवाला प्रमाण ईडीन 2019 वर्साचे सुरवेक कंपनी आड अर्थीक अनियमितताय जाल्ल्याची चवकशी सुरू केल्ली. त्या वर्सा जुलय मेरेन कंपनीची 250 कोटी रुपया परस चड मालमत्ता जप्त जाल्ली. 2 एप्रील 2022 दिसा ईडीन ताची 409.92 कोटी रुपयांची जंगम मालमत्ता जप्त केली. पांच दिसांनी फ्युचर गेमींग कंपनीन 100 कोटी रुपयांचे वेंचणूक बाॅण्ड विकत घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
