भांगरभूंय | प्रतिनिधी
गोंयांतल्या आर्विल्ल्या कोंकणी लेखकां भितरलें एक नांव म्हणल्यार जॉन आगीयार. तांची खाशेली वळख करून दिवपाची गरज ना. विंगड विंगड मळांचेर तांणी इतलो वावर केला की तांकां जायते पुरस्कार आनी पदकां फावो जाल्यात, हें तांचें ‘’थेंबे’ हें पुस्तक हातांत घेतनाच कळटा.
ह्या कविता संग्रहात कवीन कितलेशेच विशय हाताळ्ळ्यात. देव, धर्म, मोग, भय, देशभक्ती, परब, रण अशें विशय घेतले तरीय तांचे सकारात्मक विचार आसतात. वायटाचेर जैत मेळोवन सदांच हांसत रावप, दुसऱ्यांक हांसत दवरप ही तांची खाशेली मोख. तांच्या चडशा कवितांत मोगाचो आसपाव आसा. मोगाचे कितलेश्योच तरा तांणी कवितांच्या रुपान आमच्या मुखार दवरल्यात. वेंगेंतलो मोग, अर्दकुटो मोग, तुटिल्लो मोग, काळजांत दाटिल्लो मोग, म्हातारपणांतलो मोग. पूण मोगाच्या बाबतींत कवी खूब आशावादी आसात. सुटिल्ल्या, अर्दकुट्या मोगाक सांबाळपाची कळा तांचेलागीं आसा.
हिंदू धर्माचेर तांची जितली श्रद्धा आसा, तितलीच येशू ख्रिस्ताचेर आसा. दामोदर, मंगेश, म्हाळसा, महालक्ष्मी, गणेश, विठ्ठल हांकां कवी मानतात. जात, धर्म, देव हांचे मदीं कवी वेगळोचार करीना.
कवीची बरोवपाची भाशा सादी, सोंपी आनी मजकुराची खोकाय आनी कवितेची लांबय पळोवन ती रोखडीच वाचीन दिसता. पूण तांतल्या विचारांत इतली खोलाय आसता, ती समजून घेवपाक बराच वेळ खर्चूवंचो पडटा. तांतल्यान वेगळे वेगळे निकर्श काडूं येतात.
आयज मनीस यंत्रमानव जाला. साध्या -साध्या कामाक यंत्रां जाय पडटात. पारंपरिक पद्दतीन कसलेंच काम जायना. इतलें आमी यंत्रांच्या अदीन जाल्यात की ताचो परिणाम आमच्या काळजाचेर जाता आनी हाचें कवीक भंय दिसता.
कवी आशावादी आशिल्ल्यान जावन गेलां ताचेर विचार करिना. जिणेंत आयिल्ले बरे- वायट अणभव फाटीं उडोवन राग, मत्सर, दुस्वास विसरून जीण फुडें धुकलपाची शक्त मागतात. म्हातारपणांत कोण कोणाचो आसना, भुरगीं- बाळां आसून लेगीत तीं पयस आसतात, पूण जीण फुडें चलत रावता.
जॉनबाबान कविता, लेखूच बरयल्यात अशें ना. तांणी समाजाच्या विंगड विंगड विशयांचेर उजवाड घाला. तांची भास सादी, सोंपी आनी विशिश्ट अशा मजकुरांनी भरिल्ली आसा. बरोवपाची शैली तोखणाय करपा सारकी आसा. तांच्या लिखाणांतल्यान तांचें व्यक्तिमत्व दिसून येता. कवी फुडाराक बरें बरयत रावतले हातूंत दुबाव ना. तांकां तांच्या वावरांक सदांच यश मेळू, हींच परबीं.
वासंती पै काकोडे
70303 53134
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
