भांगरभूंय | प्रतिनिधी
जीत आरोलकारः मांद्र्यां आयज शिगमो उत्सव मिरवणूक
भांगरभूंय । प्रतिनिधी
पेडणें: शिगमो ही आमची संस्कृती. ती खूब गिरेस्त. ती संस्कृती तिगची हे खातीर ह्या महोत्सवाचें आयोजन केलां. संस्कृती प्रदर्शीत जाली जाल्यार तिची उदरगत जातली. मांद्रें मतदारसंघाक पयल्या नंबराचेर व्हरतनाच नव्या कलाकारांक माची मेलोवन दितले, अशें मांद्रेंचे आमदार जीत आरोलकार हांणी सांगलें. मांद्र्यां शिगमो उत्सवाचें उक्तावण केले उपरांत ते उलयताले.
ह्या वेळार माचयेर मांद्रेंची सरपंच अॅड. अमीत सावंत, उपसरपंच तारा हडफडकार, आयोजन समितीचे अध्यक्ष मुकेश सावंत, सरचिटणीस सागर तिळवे, पंच किरण सावंत, महिला समितीची मुखेली सुप्रिया खर्बे, दयानंद मांद्रेंकार, सर्तीचे परिक्षक सोमनाथ पार्सेकार, विठोबा बगळी आनी प्रशांत मांद्रेंकार हाजीर आशिल्ले.
मांद्रें पंचायत वाठारांत पयलेच खेपे आमदार आरोलकार हांणी चार दिसांच्या राज्य पांवड्या वयल्या शिगमो उत्सवाचें आयोजन केलां. अखील गोंय आनी पेडणें म्हाल मर्यादीत सर्तीचें उक्तावण केले उपरांत 21 मार्चाक शिगमो उत्सव मिरवणूक आयोजीत केल्या.
आयचे सर्तींत पेडणें म्हालांतल्या आनी पुराय गोंयांतल्या स्पर्धकांनी व्हड संख्येन वांटो घेतलो. तांच्या पालकांनीय हे कार्यावळीक हाजीर रावून संस्कृती तिगोवपा खातीर दिल्लें योगदान आपूण केन्नाच विसरचों ना. अशे तरांच्यो कार्यावळीं हे मुखारुय आयोजीत करतले, अशें आमदार आरोलकार हांणी सांगलें.
अॅड. सावंत हांणी सांगलें, मांद्रें मतदारसंघांत तशेंच मांद्रें पंचायत वाठारांत पयलेच खेपे अशे तरेचो व्हड महोत्सव आमदार आरोलकार हांच्या आदारान आयोजीत जाता. मांद्रेंकारां खातीर ही एक पर्वणीच. संस्कृती तिगोवन दवरचे आमदार आरोलकार हांणी हो आपल्या बोल्सांतले पयशे खर्च करून शिगमो उत्सव आयोजीत केला. अशा कार्यावळींतल्यान नव्या कलाकारांक उर्बा मेळटा आनी नवे कलाकार घडटात. अश्यो कार्यावळी नेमान जावच्यो. दयानंद मांद्रेंकार हांणी येवकार दिलो आनी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
