भांगरभूंय | प्रतिनिधी
मनशाच्या जिवितांत बरे विचार, बरी वागणूक, शिस्त, नैतीक मुल्यां आनी सद्गुण रुजोवपाची प्रक्रिया म्हणल्यार ‘संस्कार’. ते मनशाच्या चारित्र्याक आकार दिता आनी जिणेक योग्य दिका दितात. संस्कार मनशाच्या मनांत आवय- बापूय, शिक्षक, समाज, धर्म, आनी सैमा विशीं जागृताय निर्माण करतात. सत्य उलोवप, जाण्ट्यांक मान दिवप, प्रामाणीकपणान कार्य करप, सेवा, नमळाय, नितळसाण, देशभक्ती हीं बऱ्या संस्कारांचीं उदाहरणां. संस्कार मनशाक फकत शिकिल्लोच न्हय तर सुसंस्कृत आनी आदर्श मनीस करता. देखून जिणेंत संस्कारांक सगळ्यांत चड म्हत्व आसा. संस्कृतायेंतल्यान मनशाक फकत शिक्षण मेळना, पूण ताच्या विचारांकय सद्गुणांचें मार्गदर्शन दिता जें एक सुसंस्कृत, चारित्र्य-समृद्ध आनी आदर्श व्यक्तिमत्व घडयता. बरी- संस्कृताय वा संस्कार मनशाच्या जिवितांतली नैतिकता, कर्तव्याची भावना आनी मनीसपणाची खरी बुन्याद आशिल्ल्यान मनशाच्या जिवितांत संस्कृतायेक असामान्य म्हत्व आसा.
हिंदू धर्मांत संस्कारांक खूब म्हत्वाची सुवात आसा. मनशाचें जिवीत शुद्ध, सद्गुणी आनी आदर्श करपांत संस्कारांक आधारस्तंभ मानतात. मनशाच्या जल्मा सावन मरणा मेरेन मनशाच्या जिविताच्या दर एका पांवड्यां खातीर वेगवेगळे संस्कार थारायल्यात. हे संस्कार मन, बुद्धी आनी आचरण शुद्ध करतात. आजच्या वेगान चलपी तंत्रगिन्यानाच्या मळार भुरग्यांच्या बालमनाचेर संस्कार करप खूप म्हत्वाचें आसता. आपलो भुरगो बरो घडचो, जिवितांत ताची उदरगत जावंची आनी तो ह्या संवसारांत प्रफुल्लीत जावन सगळ्याक परजळचो अशी एक आस्त दर एकल्या आवयची आसता देखून ती आवय आपल्या भुरग्याक 5- 6 वर्सांचे पिरायेचेरूच भुरग्याक सद्गुरुंच्या चरणांचेर समर्पीत करतात.
श्री दत्त पद्मनाभ पीठ तपोभूमि हें दत्तसंप्रदायांतलें आध्यात्मीक आनी संस्कारप्रधान पीठ म्हूण कार्यारत आसा. ह्या गुरू स्थानार धर्म, संस्कार, साधना, भजन, नमस्कार, सद्गुरूगुरु भक्ती आनी भारतीय संस्कृतायेची राखण हांचेर खास भर दिल्लो आसा. हांगां वेगवेगळीं धर्मीक शिबिरां, बाल संस्कार वर्गा, सत्संग, प्रवचनां आनी समाजकल्याण कार्यावळी आयोजीत करतात. ह्या पीठाचो मुखेल उद्देश म्हणल्यार सनातन हिंदू धर्म सांबाळप, तरणाटे आनी भुरग्यां मदीं संस्काराची बीं रुजोवप, अध्यात्म आनी साधना हांकां चालना दिवप, गुरू- शिष्य परंपरा सांबाळून दवरप आनी समाजांत नैतिकता, सेवा आनी भक्ती वाडोवप.
श्री दत्त पद्मनाभ पीठ, पीठाधीश्वर पद्मश्री विभूषित सद्गुरु ब्रह्मेशानंद आचार्य स्वामीजींच्या दिव्य कृपाशीर्वादान स्वामी ब्रह्मानंद वैदिक गुरुकुल yण्ड रिसर्च इन्स्टिट्यूट आनी गोवा संस्कृत अकादमी वतीन गुरुपीठारोहण रजत महोत्सवी वर्सा निमतान बाल संस्कार शिबिराचें आयोजन केल्लें. हें शिबिर 10-14 मे ह्या कालांतरांत आयोजीत केल्लें. हें संस्कार शिबीर विद्यार्थ्यांच्या सर्वांगीण उदरगती खातीर एक खूब म्हत्वाचें साधन जावन आसा. कारण अश्या शिबिरां वरवीं भुरग्यांक बरी नैतिकता, शिस्त, नैतीक मुल्यां आनी भारतीय संस्कृतायेची वळख जाता, आयच्या आधुनीक युगांत संस्कार शिबीर भुरग्यांचें चरित्र घडोवपाक, आदरभाव आनी आत्मविस्वास जागृत आनी संस्कार रुजोवपाचें व्हड कार्य करता. ह्या संस्कार शिबीरांत विद्यार्थ्यांक प्रार्थना, योग, सरांव,संगीत, ध्यान, भजन, कथा, खेळ, गट चर्चा, कुवाडीं, ग्रंथांची म्हायती, धर्माचेर आधारीत आशिल्ली चलचित्रां आनी वेगवेगळे संस्कृतीक आनी हिंदू धर्मांचें संस्कार करपा सारके विशय
हाताळिल्ले.
ह्या कार्यावळींनी भुरग्यांच्या मनांत देवभक्ती,वदेशभक्ती, शिक्षकां आदर दिवप, पालकांचे उपकार आनी समाजसेवेची भावना निर्माण करपांत मौलादीक वांटो निभयलो. हाचे वरवी भुरग्यांनी वेळ, नितळसाण, शिस्त आनी सहकार हांचें म्हत्व शिकून घेतलें. शिबिरांत ऋषी-मुनी, संत आनी म्हान व्यक्तींच्या जिवीत चरित्रां वरवीं भुरग्यांक प्रेरणा दितात. जाका लागून विद्यार्थ्यां मदीं बरे विचार आनी सकारात्मक दृष्टीकोन विकसीत जाता. मोबायल आनी इंटरनेटच्या अती वापरा खाती नानापयत जायत आशिल्ली संस्कृती आनी मुल्यां जपपाचें कार्य हें संस्कार शिबीर करता. अशीं संस्कार शिबिरां भुरग्यांचो आत्मविस्वास वाडयतात, तांचें व्यक्तीमत्व उक्तें करतात आनी समाजांत आदर्श नागरीक जावपाक तांकां आदार करतात. स्वता कितलोय व्हड जालो तरीय आपले पांय जमनीर दवरूनच येसाक वेंग मारपाचो बोध हें संस्कार शिबिर करता. दरेका पालकान आपल्या भुरग्याक ह्या शिबिराक तपोभूमी गुरुपिठाचेर मुजरत धाडचें आनी आपलें जिवीत सदुगुरुंच्या सेवेंत समर्पीत करून समृद्ध करचें.
संस्कारां खातीर मनीस फकत शिक्षण प्राप्त करना, जाल्यार ताच्या विचारांक सद्गुणांची दिका मिळून तो सुसंस्कृत, चारित्र्यसंपन्न आनी आदर्श व्यक्तीमत्त्व म्हणून घडटा. आदर्श संस्कार हेच व्यक्तीच्या जिवितांतली नैतिकता, कर्तव्यभावना आनी मनीसपणाचें खरें अधिश्ठान आशिल्ल्यान मनशाच्या जिवितांत संस्कारांक अमूल्य महत्त्व आसा.
स्वेद सदानंद दिवकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
