भांगरभूंय | प्रतिनिधी
गोविंद गावडेः लाडफ्यां वाचपघराचें उक्तावण
भांगरभूंय । प्रतिनिधी
दिवचलः वाचनान तकली सुदारता. सुदारिल्ली तकली केन्नाच कोणा मुखार बागवना. पोट भरचे परस फाटीचो कणो दरेकल्यान ताठ दवरचो. जाचो कणो ताठ आसता ताका भिकेचे दुवाळे केन्नाच लागना, हो इतिहास आसा. वाचनाक आनी संगिताक लागून आमी संस्कारीत जातात. संस्कारा खातीर वाचपाघर खूब म्हत्वाचें आसा. दरेका गांवांनी, वाड्यावाड्याचेर वाचपघर सुरू करपाचो कला आनी संस्कृती खात्याचो विचार आसा, अशें कला आनी संस्कृती मंत्री गोविंद गावडे हांणी सांगलें.
लाडफ्यां श्री सांतेरी स्वर शृंगार वाचपघराचे उक्तावण केले उपरांत मंत्री गावडे उलयताले. ह्या वेळार तांचे वांगडा दिवचलचे आमदार डॉ. चंद्रकांत शेट्ये, भाजपा प्रदेशाध्यक्ष सदानंद तानावडे, लाटंबार्से जिल्हो पंचायत वांगडी प्रदीप रेवोडकार, लाटंबार्सेचे सरपंच पद्माकर मळीक, सरकारी माध्यमीक विद्यालयाचे मुख्याध्यापक गणेश गावडे, श्री सांतेरी केळबाय देवस्थानाचे अध्यक्ष विष्णू मळीक तशेंच श्री सांतेरी स्वर शृंगार वाचपघराचे अध्यक्ष गुरुदास गाड्डी हाजीर आशिल्ले.
गंयांत आयएएस आनी आयपीएस जावपा खातीर वाचन म्हत्वाचें. ते वाचनांतल्यान घडोवपाचो इतिहास आमी गोंयांत करतले. पुस्तका बगर ज्ञानाक पर्याय ना आनी ज्ञानदानाचें काम वाचनान जाता. विचार अंमलांत हाडचे खातीर खर यत्नांची गरज आसता. मेळिल्ले मनीस आनी वाचिल्लीं पुस्तकां वा वाचनाचो आदार घेतिल्ले मनीस आयज संवसारांत व्हड जाल्यात. तांणी आपल्या देशाचें नांव संवसाराचेर पावयलां. वाचनाच्या माध्यमांतल्यान तेंगशेर वचपाक शकता, अशें मंत्री गावडे हांणी सांगलें.
ह्या वेळार सदानंद कानावडे, डॉ. शेट्ये, विष्णू मळीक, पद्माकर मळीक, प्रदीप रेवोडकार, गणेश गावडे हांचीं उलोवपां जालीं. गुरुदास गाड्डी हांणी प्रास्तावीक केलें. अच्युत मळीक हांणी सुत्रसंचालन केलें जाल्यार विनय गाड्डी हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
