भांगरभूंय | प्रतिनिधी
पुणेः स्कूल ऑफ केमिकल सायन्सची संशोधक डॉ. दीपिका करमळकार हांकां शाश्वत उर्जेचेर केल्ल्या संशोधनाक लागून भारत सरकाराचो ‘प्रधानमंत्री अर्ली करिअर रिसर्च ग्रँट’ (PM-ECRG) भोवमान जाहीर जाला. हातूंत तांकां सुमार 60 लाखांचें संशोधन अनुदान मेळटले.
उर्जा क्षेत्रांत पर्यावरणपूरक आनी टिकावू उपाय तयार करपाक डॉ. करमळकार हांचे हें संशोधन म्हत्वाचें मानतात. तांच्या ह्या वावराक लागून फुडाराक निवळ उर्जा तंत्रगिन्यानाच्या उदरगतीक गती मेळटली अशी आस्त आसा.
देशांतल्या तरणाट्या आनी आकांक्षी संशोधकांक प्रोत्साहन दिवपा खातीर पीएम-ईसीआरजी येवजण चालीक लायल्या. हाचे वरवीं नवनिर्माणाक चालना दिवन विज्ञान आनी तंत्रगिन्यानाच्या मळार भारताची तांक घटमूट करपाचो केंद्र सरकाराचो हेत आसा.
डॉ. करमळकार हांच्या ह्या येसाची शिक्षणीक आनी संशोधन मळार तोखणाय जाता. तांच्या फुडल्या संशोधन कार्या कडेन सगळ्यांचें लक्ष लागलां. गोंय विद्यापिठानय डॉ. करमळकार हांणी मेळयिल्ल्या येसा बद्दल तांकां परबीं दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
