भांगरभूंय | प्रतिनिधी
मुरगांव, प्रतिनिधी: संविधानाचेर केल्ल्या विधाना खातीर दक्षीण गोंयचे इंडिया आघाडीचे ‘कॉंग्रेस’ उमेदवार कॅप्टन विरियातो फर्नांडीस हांकां अपात्र थारोवपाची मागणी मुरगांवचे भाजपाचे आमदार संकल्प आमोणकार हांणी केल्या. संविधानाचो अपमान करून कॉंग्रेस उमेदवार कॅ. फर्नांडीस हांणी गोंयच्या सुटके झुजार्यांचो अपमान केला. कॉंग्रेस उमेदवाराक फाटबळ दिवपी कॉंग्रेस आनी हेर इंडिया आघाडीच्या पक्षांच्या फुडार्यांनी लेखी चूक मागची. विरोधी पक्ष फुडारी युरी आलेमाव जे सगळ्यांत चड हुतात्म्यांचें ठिकाण आशिल्ल्या कुंकळ्ळें मतदार संघांतले. ताका लागून तांणी हें प्रकरण गंभीरपणान घेवप गरजेचें. कॉंग्रेस फुडारी राहुल गांधींन सगळ्या गोंयकारांची लेखी चूक मागची, अशी मागणी आमदार आमोणकार हांणी केल्या.
भारत देशाचो महत्वाचो भाग म्हळ्यार ‘देशाचें संविधान’. ताचेच आड वक्तव्य करून विरियातो हांणी सगळ्या भारतीयांचो अपमान केला, अशें श्री. आमोणकार हांणी सांगलें.
देशाचो दरेक नागरीक भारतीय संविधानाचो खूब आदर करता. मात, कॅप्टन विरियातो हांणी, भारत देशाचें संविधान गोंयचेर लादलां, अशें वक्तव्य केलां तें पुरायेन चुकीचें. कॅ. फर्नांडीस हांकां राज्य निर्वाचन अधिकार्यांनी सोमतेच निलंबीत करप गरजेचें. तांणी राष्ट्रमोगी भारतियांचो अपमान केला. तांचे आड निर्वाचन अधिकार्यांनी खर कारवाय करप गरजेचें. कॅ. फर्नांडीस हांचें वक्तव्य सामकें सकयल्या दर्जाचें आशिल्ल्यान निर्वाचन अधिकार्यांनी तांकां लोकसभा वेंचणुकेंतल्यान अपात्र थारोवपाची मागणीय आमदार आमोणकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
