भांगरभूंय | प्रतिनिधी
विरियातोंच्या विधानाची स्वता प्रधानमंत्र्यांनी घेतली दखलभाजप फुडाऱ्यांचो काँग्रेसीचेर हल्लो
पणजी: लोकसभा वेंचणुकेंतले काँग्रेसचे दक्षीण गोंयचे उमेदवार कॅ. विरियातो फर्नांडीस हांणी भारतीय संविधाना संदर्भांत केल्ल्या विधाना वयल्यान गोंया सयत देशभरांतलें राजकारण तापलां. प्रधानमंत्री नरेंद्र मोदी, मुख्यमंत्री डॉ. प्रमोद सावंत हांचे सयत भाजपाचे हेर फुडारी हाचे वयल्यान काँग्रेसीचेर तुटून पडल्यात. जाल्यार काँग्रेस फुडाऱ्यां कडल्यानूय तांकां प्रत्युत्तर दितात.
प्रधानमंत्री नरेंद्र मोदी हांणी मंगळारा छत्तीसगडांत जाल्ले जाहीर सभेंत उलयतना विरियातो फर्नांडीस हांच्या विधानाचो संदर्भ दिवन काँग्रेसीचेर टिका केली. काँग्रेसच्या गोंयांतल्या उमेदवारान संविधाना विशीं चुकीचे विधान करून डॉ. बाबासाहेब अांबेडकर आनी संविधानाचो अपमान केला, असो आरोप प्रधानमंत्री नरेंद्र माेदी हांणी केलो.
मजगतीं, मुख्यमंत्री डॉ. प्रमोद सावंत हांणी सोमाराच सोशल मिडिया वरवीं विरियातो फर्नांडीस हांच्या विधाना वयल्यान टिका केल्ली. भारतीय राज्यघटना गोंयकारांचेर जबरदस्तीन थापिल्ल्याचो दावो काँग्रेसच्या दक्षीण गोंयांतल्या उमेदवारान केला. गोंय हो भारताचो अविभाज्य भाग आसा, हाचेर आपल्या स्वातंत्र्यसैनिकांचो मना पसून विस्वास आशिल्लो. काँग्रेसीन गोंय मुक्ती खातीर 14 वर्सां कळाव केलो. आतां तांच्या उमेदवारान भारतीय संविधानाची पायमल्ली करपाचे धाडस केलां. काँग्रेसीन हे ‘भारत तोडो’ चें राजकारण बेगोबेग थांबोवचें. काँग्रेस हो आपल्या लोकशायेक धोको आशिल्ल्याचे मुख्यमंत्र्यांनी नमूद केल्ले. ते उपरांत ह्या विशयाची आतां स्वता प्रधानमंत्री नरेंद्र मोदी हांणीय गंभीर दखल घेतल्या.
…………………
नेमके कितें म्हणिल्लें विरियातो हांणी
-फाटलो लोकसभा वेंचणुकेच्या काळांत 10 मार्च 2019 दिसा काँग्रेस फुडारी राहूल गांधी गोंयांत आयिल्ले. त्या वेळार ‘गोंयचो आवाज’ संघटणे वतीन आपणाक तांचे कडेन संवाद सादपाक मेळ्ळो.
-त्या वेळार आपूण राहूल गांधी हांचे मुखार गोंयांतले 12 मुद्दे उपस्थीत केल्ले. तातूंत दोट्टी नागरिकत्याच्या मुद्याचोय आस्पाव आशिल्लो. पूण त्या वेळार राहूल गांधी हांणी हो मुद्दो संविधानीक आशिल्ल्याचे सांगून चर्चेक न्हयकार दिलो.
-त्या वेळार आपूण तांकां 26 जानेवारी 1949 दिसा संविधानाची अंमलबजावणी जाली. त्या वेळार गोंय भारताचो भाग नाशिल्लो. पूण, 1961 त गोंयाक स्वातंत्र्य मेळ्ळे उपरांत संविधान गोंयकार लोकांचेर लादिल्ल्याचे सांगलें.
-काश्मीर खातीर केद्रान कलम 370 लागू केलां. पूण गोंया खातीर कितेंच करूंक ना. दोट्टी नागरिकत्वाच्या विशयाचो फटको पोटा खातीर हेर देशांत वचपी गोंयकारांक बसता, अशें आपूण तांकां सांगिल्लें. त्या वेळार राहूल गांधी हांणी अापले म्हणणें मान्य केले.
…………………….
भाजपा कडल्यान विरियातो हांकां अपात्र थारावपाची मागणी
भाजपाचे मडगांवचे अामदार दिगंबर कामत हांणी संगळारा सकाळीं पणजेंतल्या भाजप कार्यालयांत पत्रकार परिशद घेवन, विरियातो फर्नांडीस हांणी भारतीय संविधानाचो अपमान केल्ल्याची टिका केली. तशेंच हे विशीं भाजपान वेंचणूक अायोगा कडेन कागाळ दाखल केल्या. संविधानविरोधी विधान केल्ले प्रकरणांत विरियातो फर्नांडीस हांकां वेंचणूक लडोवपाक अपात्र थारावचे, अशी मागणी केल्ल्याचे तांणी सांगलें.
…………………………
काँग्रेसचें म्हणणें कितें
-कॅ. विरियातो फर्नांडीस हांच्या व्हिडिओंतलो थारावीक भाग कापून त्या उतरांचो भाजपान विपर्यास केल्ल्याचो दावो काँग्रेस प्रदेशाध्यक्ष अमीत पाटकार हांणी मडगांवांत घेतिल्ले पत्रकार परिशदेंत केलो.
-विरियातो फर्नांडीस हांणी 26 वर्सां देशाची सेवा केल्या. कारगिलच्या झुजांत तांणी सहभाग घेतिल्लो. अशा व्यक्तीक संविधान विरोधी म्हणप योग्य आसा व्हय, असो प्रस्न तांणी केलो.
-भाजपाची राज्यांतल्या दोनूय सुवातांचेर हार निश्चीत आसा. ताका लागुनूच भाजपा कडल्यान चुकीच्या पर्यायांचो वापर जाता. प्रधानमंत्री मोदी हांणी गोंय आनी काँग्रेस उमेदवारा विशीं चुकीचीं विधानां करून हेर राज्यांतल्या लोकां मदीं गैरसमज पातळावचे न्हय, अशें तांणी म्हणलें.
-विरियातो फर्नांडीस हे दक्षीण गोंयांतल्यान जिखून येवपाचे निश्चीत अाशिल्ल्यान भाजपा कडल्यान चुकीचे आरोप जातात. विरोधी आमदारांक पक्षांत घेवन भाजपानूय संविधानाचो अनादर केला, अशेंय तांणी नमूद केले.
……………………………..
प्रधानमंत्री मोदींचे म्हणणें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
