भांगरभूंय | प्रतिनिधी
पणजी, बातमीदार ः ज्येश्ठ साहित्यिक आनी विचारवंत अर्जुन जयराम परब (88) संवसाराक अंतरले. तांचे कुडीचेर आयज दनपारां विर्नोड्यां-पेडणें हांगा निमणे संस्कार जाले.
मुळ पेडणें विर्नोड्यांचे अर्जुन परब कामाक लागून वास्को स्थायीक जाल्ले. वास्कोच्या माता हायस्कुलांत तांणी 30 वर्सां शिक्षक म्हणून काम केलें. ह्या काळांत ते सहाय्यक प्राचार्य म्हणूनय आशिल्ले. शिक्षक आसतना तांणी वेगवेगळ्या विशयांचेर संकल्पनात्मक, संशोधन आनी परखड लेखन बरयले. ‘शिवाजी त्यांचा, शिवाजी आमचा’, ज्ञानदीप लावू जगी, सनातन संस्कृतीचा पंचनामा, गरीब देशातील श्रीमंत देव, धर्मांतर ते राष्ट्रांतर, निंदकाचे घर, आशेचा अंकुर (नाटक), क्रांतिवीर भगतसिंग, डॉ. बाबासाहेब आंबेडकर एक चिंतनh प्रकटन, लोककला दशावतार, श्रींची इच्छा, ज्ञानयोगी ज्ञानेश्वर, विचारवेध, संत गाडगेबाबांची कीर्तने आदीं तांचीं पुस्तकां प्रसिध्द आसात. तशेंच डॉ. लोहिया हांचे समाजवाद विरुद्ध हिंदुत्ववाद, मराठी ही आमची आवयभास ही पुस्तकां प्रकाशीत जावपाची आसात. हाचे भायर राजकारण, समाजीक जागृताय, अंधश्रध्दा ना करप आदी विंगड विंगड विशयांचेर तांणी बरयल्ले लेखय वेगवेगळ्या दिसाळ्यांनी उजवाडाक आयले.
गोमंत विद्या निकेतन मडगांव, गोमंतक मराठी अकादेमी, महात्मा ज्योतिबा फुले, आंबेडकर संस्था, पुणे, महाराष्ट्र सरकार उत्कृश्ट संशोधन, दलित मित्र अशें प्रतिश्ठीत पुरस्कार तांका फावो जाल्यात. इतलेंच न्हय तर साहित्य, उपक्रम आनी समाजसेवेच्या वावराक लागून गोमंतक मराठी अकादेमीचो मानादीक वांगडीपणाचोय भोवमान तांका मेळ्ळो. अर्जुन परब हांच्या मरणाक लागून समाजीक, शिक्षणीक आनी साहित्यीक मळा वयल्यान दुख्ख उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
