भांगरभूंय | प्रतिनिधी
म्हापशें, प्रतिनिधी ः भाजपा सरकार स्वताक व्हड देशभक्त समजता आनी कलम 370 रद्द केल्ल्याचें व्हडपण सांगता. जाल्यार काश्मीर देंगणांतल्या लोकसभेच्या तिनूय जाग्यांचेर कित्याक लडले नात हाची जाप भाजपा वतीन गृहमंत्री अमित शाह हांणी दिवचें अशें आव्हान काँग्रेस सेवा दलाचे कार्य मुखेली राजन घाटे हांणी भाजपाक दिलां.
आयज म्हापशें हांगाच्या पक्ष कार्यालयांत जाल्ले पत्रकार परिशदेंत ते उलयताले. ह्या वेळार विश्वास नागवेकार, दामोदर शिरोडकार, दीना मावलणकार आनी हेर हाजीर आशिल्ले.
राजन घाटे हांणी फुडें सांगलें, प्रधानमंत्री नरेंद्र मोदी काश्मीर देगणांतल्या तिनूय जाग्यांचेर कित्याक लढो दिनात. मणिपूरांत हिंचासार जालो, प्रधानमंत्री थंयूय वचूंक ना. पुलवामाच्या शहीद जवानांच्या नांवांचेर भाजपा मतां मागता. गृहमंत्री अमित शाह हें एक घुस्पागोंदळाचें व्यक्तीमत्व. भाजपा मोदींची गॅरंटी दिता. पूण एकवेळ चीनाच्या उत्पादनांची हमी दिवं येता. पूण मोदींचे गॅरंटीक ना अशी टिका घाटे हांणी केल्या.
त्या वेळार सरदार वल्लभभाई पटेल आनी राजा हरिसिंग हांचे मदीं वाटाघाटी जाले उपरांत कलम 370 लागू जाल्लें. तें रद्द केल्ल्याची खोशी जाली. पूण हाचे फाटल्यान भाजपाचो एक लिपिल्लो अजेंडा आसा. जम्मू- काश्मीरांत व्हड प्रमाणांत लिथियमाचे सांठे उपलब्ध आसात. हे लिथियम विजेचेर चलपी वाहनांच्या बॅटरीचो हो एक म्हत्वाचो घटक. अडाणी आनी अंबानी हांकां ही जमीन विकत घेवंक मेळची म्हणून भाजपान कलम 370 काडून उडयलां असो गंभीर आरोप घाटे हांणी केलो.
म्हारगाय वाडत आसा आनी सामान्य लोकांक ती परवडना. खावपाच्या तेलांचे दर वाडल्यात. भाजपा सरकार आनी मोदी हे गजाली कडेन लक्ष दिनात अशें विश्वास नागवेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
