भांगरभूंय | प्रतिनिधी
पणजी, बातमीदार ः दक्षीण गोंयचे काँग्रेसीचे उमेदवार विरिएतो फर्नांडीस हांणी संविधानाचो अपमान केला. संविधाना प्रमाण चलपी वेंचणूक प्रक्रियेंत वांटो घेवपाचो तांकां अधिकार ना. देखून तांकां वेंचणूक लढोवपाक अपात्र थारावचे अशी मागणी भाजपान केलां. हे संबंदी मुखेल वेंचणूक अधिकारी रमेश वर्मा कडेन कागाळ केल्ल्याची म्हायती आमदार दिगंबर कामत हांणी दिली.
आयज पणजीतांतल्या भाजपाच्या मुखेल कार्यालयांत जाल्ले पत्रकार परिशदेंत आमदार कामत उलयताले. ह्या वेळार आदले आमदार दामू नायक आनी ग्लेन टिकलो आनी आदले मंत्री दिलीप परुळेकार हाजीर आशिल्ले.
विरिएतो फर्नांडीस हांणी संविधाना संबंदीं दिल्लें विधान गंभीर आसा. अर्ज दाखल करतना खंयचोय उमेदवार सोपूत घेता. ते प्रमाण उमेदवाराक भारताच्या संविधानाची राखण करुन आनी ताचो मान दवरतलें अशें सांगचें पडटा. अशें आसून लेगीत फर्नांडीस हांणी गोंय मुक्ती उपरांत गोंयकारांचेर संविधान लादलें अशें विधान केलें. अशी टिप्पणी धक्को दिवपी आसा. हे विशीं काँग्रेस पक्षान आपली भुमिका स्पश्ट करची अशें आमदार कामत हांणी सांगलें.
गोंय मुक्त जाल्लो तेन्ना भारताचो प्रधानमंत्री कोण आशिल्लो तेंय काँग्रेसीन सांगचें. भारताचें संविधान हें संवसारांतलें एक बरें संविधान मानतात. संविधान बरोवपी डॉ. बाबासाहेब आंबेडकराचोय फर्नांडिस हांणी अपमान केला. हे विशीं दिल्लींतल्या वेंचणूक आयोगा कडेन प्रदेशाध्यक्ष सदानंद शेट तानावडे हांणी कागाळ केल्या अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
