भांगरभूंय | प्रतिनिधी
मडगांव, प्रतिनिधी : सबका साथ सबका विकास ह्या धोरणा वरवीं भाजपान देशाची उदरगत केल्या. संविधानाचेर घालो घाल्ल्याचें सांगून कॉंग्रेस आनी विरोधक लोकांक फटोवपाक लागल्यात, अशी मुख्यमंत्री डॉ. प्रमोद सावंत हांणी सांगलें. दक्षीण गोंय लोकसभा उमेदवार पल्लवी धेंपो हांणी उमेदवारी अर्ज भरचे पयलीं ते तकार्यकर्त्यां कडेन संवाद सादताले.
डॉ. बाबासाहेब आंबेडकर हांणी जें संविधान भारताक दिलां तें आमचे खातीर प्राधान्य जावन आसा. चंद्र आनी सूर्य जो मेरेन आसा तो मेरेन हें संविधान कायम उरतलें. अल्पसंख्यांकांक भेकडावपा खातीर संविधान बदलतलें म्हणून चुकीचें सांगू नाकात. कॉंग्रेसीन सदांच जाती आनी धर्माच्या नांवा खाला प्रचार केला, मतां मागल्यांत. भाजपाक जाती- धर्माचेर मतां मागपाची गरज ना, अशें मुख्यमंत्र्यान फुडें म्हणलें.
प्रधानमंत्री नरेंद्र मोदी हांच्या कामांची वळेरी सादर करतना तांणी म्हणलें, राज्यांतल्या नागरिकांक गरजेच्यो सुविधा मोदी हांच्या सरकारान दिल्यात. कॉंग्रेसीचीं ६० वर्सां आनी मोदी सरकाराचीं १० वर्सां हाची तुळा केल्यार उदरगतीचीं कामां मोदी हांच्या कार्यकाळांत चड जाल्ल्याचें कोणाकूय दिसून येतलें. लोकां खातीर विंगड विंगड येवजण्यो हाडल्यो. कॉंग्रेसीन लोकांक सुविधा दिवंक नात. जाल्यार उदक, शौचालय, घरां, वीज ह्यो मोलादीक सुविधा मोदी सरकारान दिल्यो. हाचे पयलीं कार्यकर्त्यांनी जिवाचें रान करुन प्रचार केला. आतां फुडले २० दिसूय कार्यकर्त्यांनी लोकांच्या घराघरांनी वचून प्रचार करचो, सरकारान केल्लीं कामां लोकां मेरेन पावोवचीं. ह्या वेळार जें मत तुमी दितले तें पल्लवी धेंपो हांचे खातीर न्हय, जाल्यार तें देशाचे उदरगती खातीर दितले. देशाच्या फुडल्या २५ वर्सांच्या उदरगतींच्या कामांक फाटबळ दिवपाचें काम हे वेंचणुकेंतल्यान जातलें. नारी शक्तीची, युवा शक्तीची, किसान शक्तीची उदरगत करपा खातीर तशेंच गरिबांचें कल्याण करपाक मतदान करचें, असो उलो तांणी मारलो.
भाजपाची तांक हांचे खातीर वाडल्या…
उदरगतीचे नदरेन गोंय खंय फाटीं उरचें ना. २०१९ त कांय मतांनी दक्षीण गोंयचो जागो चुकिल्लो. तेन्ना आदले मुख्यमंत्री दिगंबर कामत, रवी नायक, आलेक्स सिक्वेरा, सुदीन ढवळीकार हे आमचे वांगडा नाशिल्ले, मात ते सगळे आतां भाजपा वांगडा आसात. अशी डबल ताकद भाजपा वांगडा आशिल्ल्यान जैत निश्चीत आसा, अशें मुख्यमंत्र्यान म्हणलें.
धेंपो हांचे कडल्यान अर्ज सादर
लोकसभा वेंचणुके खातीर भाजपाची दक्षीण गोंयची उमेदवार पल्लवी धेंपो हांणी दक्षीण गोंय जिल्होधिकारी तशेंच जिल्हो वेंचणूक अधिकारी अश्विन चंद्रू ए. हांचे कडेन उमेदवारी अर्ज सादर केलो. ह्या वेळार मुख्यमंत्री डॉ. प्रमोद सावंत, मंत्री आलेक्स सिक्वेरा, मंत्री रवी नायक, मंत्री सुदिन ढवळीकार हाजीर आशिल्ले.
केंद्रान राज्याक कोट्यांनी रुपयांचो निधी दिला. उदरगतीच्या कामांचेर भाजपा दोनूय लोकसभा जागे जिखतले. संविधान, लोकशाहीचेर उलोवप्यांनी आदीं आमदारांक मान दिवपाक शिकचें. टिका करतनाय शब्द जपून वापरचे. आमदारां खातीर असैविधानीक शब्द वापरचे न्हय. दक्षीण गोंयांत अपेस येतलें अशें समजून कॉंग्रेस थर्त भियेल्या. श्री रामाच्या देवळांत वचून तांचो आशिर्वाद घेवपाचो आशिल्ल्यान आमी अर्जांचें सादरीकरण एका दिसा पयलींच केलें. देशांत रामराज्य भाजपानूच हाडलां. रामसेतू तोडपाक जांणी प्रतिज्ञापत्र दिलां तांणी रामनमीचें म्हत्व आमकां सांगचें न्हय, अशें मुख्यमंत्र्यांनी अर्ज सादरीकरणा उपरांत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.