भांगरभूंय | प्रतिनिधी
साहित्यकार माधव बोरकार, मेल्वीन रॉड्रिगीश हांचे कडेन संवाद
मडगांव, प्रतिनिधी: कोंकणी भाशा मंडळान संवसारीक मायभास दिसा निमतान ‘भास-संवाद’ हे कार्यावळीचें आयोजन केलां. तातूंत साहित्यकारां कडेन तरणाटे तशेंच शिक्षणीक क्षेत्रांतल्या वावुरप्यांचो एक खाशेलो संवाद घडोवन हाडटले. अंदूं हे कार्यावळींत साहित्यकार माधव बोरकार आनी मेल्वीन रॉड्रिगीश हांचे कडेन भास-संवाद जातलो. ही कार्यावळ २१ फेब्रुवारीक सकाळीं ९.३० वरांचेर फादर आग्नेल महाविद्यालय, पिलार हांगा जातली. कार्यावळीक महाविद्यालयाचो मोलादीक हातभार लागला. हे कार्यावळींत ह्या साहित्यकारांक प्रस्न विचारपाची संद उपस्थितांक मेळटली.
हे कार्यावळीक गोंयांतल्या साबार महाविद्यालयांतले तशेंच गोंय विद्यापिठाचे विद्यार्थी हाजीर रावतले. महाविद्यालयीन विद्यार्थी तशेंच वाचकांनी हे कार्यावळीक व्हडा संख्येन हाजीर रावचें असो उलो मंडळाची अध्यक्ष अन्वेषा सिंगबाळ हांणी मारला. ही कार्यावळ सगळ्यां खातीर उक्ती आसा.
शिक्षणीक पुरस्कार आनी शिश्यवृत्त्यो भेटयतले
ह्या वेळार मंडळाच्या शिक्षणीक पुरस्कार तशेंच शिश्यवृत्तींची भेटवण जातली. अंदूं धावेचे परिक्षेंत कोंकणी विशयांत सगळ्यांत चड गूण फावो जाल्ले खातीर राधा प्रदीप काकोडकार तशेंच बारावेचे परिक्षेंत सगळ्यांत चड गूण फावो जाल्ले खातीर पुरषोत्तम उर्फ दिप्तम राजेंद्र पै वैद्य आनी बी. ए. चे परिक्षेंत कोंकणींत चड गूण मेळयल्ले खातीर मेगन रोजलींड दे सौजा, तशेंच एम.ए.चे परिक्षेंत कोंकणीं चड गूण मेळयल्ले खातीर स्नेहा सतीश सबनीस हांचो भोवमान जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
