भांगरभूंय | प्रतिनिधी
खबरां संस्था
पटाया- भारताच्या प्रमोद भगत, सुहास यथिराज आनी कृष्णा नागर थायलंडान पटाया हांगा सुरू आशिल्ल्या संवसारीक पॅरा- बॅडमिंटन सर्तींत वेगवेगळ्या प्रकारांतल्यान दादल्यांच्या एकोडींच्या फायनलींत प्रवेश केलो. शेनवारा जाल्ल्या उपांत्य फेरयेंल्या मॅचींत एसएल-4 विभागांत संवसारीक क्रमवारींत तिसरे सुवातेर आशिल्ल्या यथिराजान फ्रान्साच्या पयले सुवातेर आशिल्ल्या लुकास मझूराचें आव्हान 21-16, 21-19 अशें मोडून काडलें. लुकासन पोरूंच्या पॅरालिम्पिकांच भांगरा पदक मेळयल्लें.
40 वर्सां पिरायेचो यथिराज सध्या उत्तर प्रदेश सरकारांत युवा कल्याण विभागाचोस सचीव आनी पणतिया राखण दलाचो म्हासंचालक आसा. फायनलींत ताका आतां इंडोनेशियाच्या फ्रेडी सेतिआवाना आड खेळचें पडटलें. सितिआवानान दुसऱ्या उपांत्य मॅचींत भारताच्या सुकांत कदमाक 21-13, 21-19 अशें हारयले, दादल्यांच्या एसएल-3 गटांत पॅरालिम्पीक जैतिवंत प्रमोद भगतान आपलोच वांगडी मनोज कुमार सरकाराक 23-21, 20-22, 21-18 अशें हारोवन फायनलींत प्रवेशकेलो. फायनलींत ताका ब्रिटनाच्या डॅनियल बेथला आड खेळचें पडटलें. बेथेलान उपांत्य मॅचींत भारताच्या नितीश कुमाराक 21-18, 21-17 अशें हारयले.
एसएच-6 गटांतल्या फायनलींत प्रवेश करतना कृष्णा नागरान ब्राझिलाच्या व्हिक्टर तावारेसाक 21-16, 21-17 अशें हारयलें आतां ताका चीनीच्या लीन नैली आड खेळचें पडटलें. बायलां विभागांत एसयू-5 गटांत मनिषा रामदासान फ्रान्साच्या मैद लेफोर्टाक 19-21, 21-12, 21-14 अशें हारोवन फायनलींत प्रवेश केलो. दोट्टींत रचना शैलेशकुमार- नित्या श्री समुथी सिवान हे जोडयेन इंडोनेशियाच्या दारिया बुजानिका आनी ओलिविया झिमगिएस जोडयेक 21-16, 21-17 अशें हारयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
