भांगरभूंय | प्रतिनिधी
पणजी: भारतीय मध्यमवर्ग हो संवसारांतलो सगळ्यांत चड रिणांचो वर्ग अशें मुंबयचे इक्विटी रणनितीकार, अर्थशास्त्रज्ञ आनी फंड वेवस्थापक सौरभ मुखर्जी हांणी सांगलें. मुखर्जी हे तांच्या नव्या “ब्रेकपॉयंट – द क्रायसिस ऑफ द मिडल क्लास अँड द फ्यूचर ऑफ वर्क” ह्या पुस्तकाचे लेखक आसात. मुखर्जी शुक्रारा इंटरनॅशनल सेंटर गोंय (आयसीजी) हांगा आयोजीत केल्ल्या “किताब – बुक्स इन डिस्कशन” कार्यावळींत उलयताले.
दर वर्सा 80 लाख पदवीधर महाविद्यालयांतल्यान भायर सरतात त्या देशांत ह्या तरणाट्यां खातीर फावो ती नोकरेची संद उपलब्ध ना. ‘ब्रेकपॉयंट’ हातूंत आमी स्पश्ट केला की सोशल मिडिया वरवीं बऱ्या जिणे पद्दतीची इत्सा वाडत आसा, आनी सभ्य नोकऱ्यो नाशिल्ल्यान मानसीक भलायकेच्या समस्यांनी वाड जावपाक लागल्या आनी रिणाचे प्रमाण खूब वाडलें. भारतीय मध्यमवर्ग हो संवसारांतलो सगळ्यांत चड रिणांचो वर्ग अशें मुखर्जी हांणी म्हणलें.
आपल्या संशोधनांतल्यान कांय धक्को दिवपी आंकडेवारी सादर करतना मुखर्जी हांणी सांगलें, फाटल्या धा वर्सांत भारतांतल्या व्हायट कॉलर नोकऱ्यांतलो सरासरी पगार चडसो स्थिर उरला. 2016 वर्सा सरासरी वर्सुकी पगार 10.2 लाख रुपया आशिल्लो, पूण 2026 वर्सा तो फकत 10.7 लाख रुपया मेरेन वाडला.
मुखर्जी हांच्या मतान 2020 वर्सा सावन खास करून म्हायती तंत्रगिन्यान (आयटी) क्षेत्रांतल्या 40 ते 55 वर्सां पिरायेच्या जायत्या वेवसायीकांक नोकऱ्यो व्हगडायच्यो पडल्यात. मध्यम पिरायेच्या वेवसायिकांची सुवात नेटान तरणाटे वेवसायीक आनी कृत्रिम बुद्धिमत्ता (एआय) तंत्रज्ञान घेवपाक लागल्यात अशें तांणी सांगलें.
मध्यमवर्गीय रिणाचें खर चित्र स्पश्ट करतना मुखर्जी हांणी सांगलें, 70 टक्के मध्यमवर्गीय भारतीयांनी रीण घेतलां आनी तांच्या उत्पन्नांतले सुमार 40 टक्के रीण फारीक करपा खातीर खर्च जाता. धक्को दिवपी गजाल म्हळ्यार ह्या रीणांतले 50 टक्के रीण तांच्या भुरग्यांच्या उच्च शिक्षणा खातीर घेतात. चडशा प्रकरणांनी लोकांची पुराय बचत हे प्रक्रियेंत सोंपता अशें मुखर्जी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
